भांगरभूंय | प्रतिनिधी
मडगांवकारांचीं निदर्शनां : बेकायदो आस्थापनांक कराचे कक्षेंत हाडपाची मागणी
भांगरभूंय । प्रतिनिधी
मडगांव : मडगांव पालिका वाठारांतल्या करांत वाड करपाचो निर्णय घेतला. करांतली ही दरवाड सर्वसामान्यांचेर वजें आसा. आदीं पालिकेचो फाटलो सोपो कर आनी हेर पयशां सयत बेकायदो वेपार करप्यां कडल्यान कर एकठांय करात. ते उपरांत कर वाड करात, अशें मडगांवच्या लोकांनी सांगलें.
मडगांव पालिका वाठारांतल्या करांत वाड करपा संबंदांत ज्या वेळार पालिकेची बसका जाल्ली, त्या वेळार फकत 10 ते 20 टक्के करांत वाड करतात अशें सांगिल्लें. मात आतां करात वाड केल्ले रकमेचो विचार केलो जाल्यार कांय कडेन 50 त 100 टक्के करांत वाड काल्या. सध्या जीसुडा कडल्यान नेमिल्ले एजन्सी कडल्यान सर्व्हे करतात. तातूंत परवान्या बगर वेपार करप्यांचीं नांवां उक्तीं जातलीं. तातूंतल्यान लेगीत व्हड प्रमाणांत पालिकेक महसूल मेळपाक शकता. हो महसूल आदीं एकठांय करचो, अशी मागणी निदर्शनां करप्यांनी केली. ह्या वेळार सावियो कुतिन्हो, मोहनदास लोलयेंकार, मरिनो रिबेलो हांचे सयत मडगांवचे लोक हाजीर आशिल्ले.
सावियो कुतिन्हो हांणी सांगलें, एसजीपीडीए कडल्यान कोयर संकलनाची फी फाटल्या 10 वर्सां सावनची बाकी आसा. ती 70 ते 80 लाखांची रकम येवपाची आसा. तशेंच कांय पेट्रॉल पंपांची रकम येवपाची आसा. लिपिका कडल्यान 17 लाखांची अफरातफर केल्ली, ते पयशे येवपाचे आसात. खूब जाणांनी घरपटी भरूंक ना. बेकायदो आस्थापनां, बांदकामां चालू आसात. तांचे कडल्यान कराची रकम हाडली जाल्यार मडगांव पालिकेक व्हड प्रमणार कर वाड करपाची गरजूच लागची ना, अशें तांणी सांगलें. वाडयल्ल्या कराक लागून ल्हान वेवसायिकांक हें अर्थीक वजें जातलें. सर्व्हे उपरांत बेकायदो आस्थापनां कडल्यान दंडा सयत वेपार परवानो घेतलो जाल्यार कोटींनी महसूल मेळटलो. ताका लागून ही दरवाड करपाची गरज पडची ना. तरी लेगीत महसूल उणो जालो जाल्यार दरवाडीची टक्केवारी लेगीत उणी जातली, अशें कुतिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
