भांगरभूंय | प्रतिनिधी
मडगांव : गिमांतल्यो सुटयो आनी गुड फ्रायडे आनी इस्टरा निमतान जावपी प्रवाशांची गर्दी लक्षांत घेवन कोकण रेल्वेन मडगांव ते बंगळुरू आनी मडगांव ते मुंबय मजगतीं विशेश गाडयो चलोवपाचो निर्णय घेतला. दक्षीण-पश्चीम रेल्वेच्या सहकार्यान ह्या फेर्यांचे नियोजन केलां.
यशवंतपूर-मडगांव-बंगळुरू कॅन्टोन्मेंट खासा ट्रेन
इस्टरचे फाटभूंयेर धांवपी ही गाडी गोंय आनी कर्नाटक मजगतींच्या प्रवाशां खातीर सोयीची थारतली. गाडी नंबर ०६२७१ यशवंतपूर ते मडगांव ही गाडी २ एप्रिलाक यशवंतपूरच्यान रातची २३.५५ वरांचेर सुट्टली आनी दुसर्या दिसा सांजेवेळार १७.३० वरांचेर मडगांवां पावतली.
गाडीनंबर ०६२७२ मडगांव ते बंगळुरू कॅन्टोन्मेंट ही गाडी ५ एप्रिलाक मडगांवच्यान सकाळीं ११ वरांचेर सुट्टली आनी दुसर्या दिसा सकांळीं ५.२० वरांचेर बंगळुरू कॅन्टोन्मेंट पावतली. ही गाडी कुणिगल, हासन, सुब्रमण्य रोड, मंगळुरू (बंतवाला), उडुपी, कुंदापुरा, मुरुडेश्वर, कारवार आनी काणकोण आनी हेर मुखेल स्टेशनांचेर ही गाडी थारतली.
मुंबय सीएसएमटी – मडगांव – मुंबय सीएसएमटी ही सप्तकी खासा गाडी
गिमाच्या दिसांनी मुंबय आनी गोंयां मजगतीं विशेश सप्तकी गाडी चलयतले. गाडी नंबर ०१०१९ मुंबय ते मडगांव ही ५ एप्रिल ते ७ जून ह्या काळांत दर आयतारा सकाळीं ००.५५ वरांचेर ही गाडी मुंबय सीएसएमटीवेल्यान सुट्टली आनी त्याच दिसा दनपरां ५.१५ वरांचेर मडगांवां पावतली.
गाडी नंबर ०१०२० मडगांव ते मुंबय ही ५ एप्रिल ते ७ जून ह्या काळांत दर आयतारा सांजेवेळार १६.०० वरांचेर ही गाडी मडगांवच्यान सुट्टली आनी दुसर्या दिसा सकाळीं ३.५० वरांचेर मुंबय पावतली. ही गाडी दादर, ठाणे, पनवेल, रोहा, खेड, चिपळूण, रत्नागिरी, राजापूर रोड, कणकवली, सिंधुदुर्ग, कुडाळ, सावंतवाडी, थिवी आनी करमळे रावतली.
गाडी नंबर ०६२७२ आनी ०१०२० खातीरचें बुकिंग १ एप्रिल सावन सगल्या आरक्षण केंद्रांचेर आनी रेल्वेच्या संकेतस्थळांचेर सुरू जातलें. चड म्हायती खातीर प्रवाशांनी www.enquiry.indianrail.gov.in हे वेबसायटीर वयचें वा कोकण रेल्वेचो ऍप डावनलोड करचो, असो उलो रेल्वे प्रशासनान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
