भांगरभूंय | प्रतिनिधी
गोवा फॉरवर्ड पक्षाची जिल्होधिकाऱ्या कडेन मागणी
भांगरभूंय । प्रतिनिधी
मडगांवः जिल्होधिकारी कार्यालयांतले लिपीक आनी हेर पदांची भरती प्रक्रियेंत पारदर्शकताय ना, ती पुराय तरेन बेकायदेशीर आसा. ही नोकर भरती प्रक्रिया रद्द करची, अशी मागणी गोवा फॉरवर्ड पक्ष वतीन दक्षीण गोंय जिल्होधिकाऱ्या कडेन केल्या. गोवा फॉरवर्ड पक्षाच्या शिश्टमंडळान दक्षीण गोंयची जिल्होधिकारी एग्ना क्लिटस हांची भेट घेवन हे विशींचें निवेदन सादर केलें.
जिल्होधिकारी कार्यालयांत लिपीक आनी हेर पदां भरचे खातीर जी निवड प्रक्रिया हातांत घेतिल्ली, ती पुराय बेकायदेशीर आसा. ती रद्द करची, अशी शिश्टमंडळान मागणी केली. ही भरती प्रक्रिया 2019 त सुरू केल्ली. जे अधिसुचोवणे वरवीं ही भरती प्रक्रिया केल्या तिची कायदेशीर वैधता सोंपल्या. ते खातीर ही पुराय प्रक्रियाच बेकायदेशीर आसा आनी ती तत्काळ रद्द करची, अशी मागणी केल्या.
ह्या शिश्टमंडळांत दुर्गादास कामत हांचे सयत गोवा फॉरवर्डाचे उपाध्यक्ष दिलीप प्रभुदेसाय, सरचिटणीस मोहनदास लोलयेंकार, पुजा नायक आनी हेर वांगड्यांचो आस्पाव आशिल्लो. 2019 त नोकर भरती प्रक्रिया सुरू केल्ली ती पुराय जावपाक चार वर्सांचो काळ लागला. 2019 त जिल्होधिकारी कार्यालयांत कर्मचाऱ्यांची गरज लागिल्ली, जाल्यार ही प्रक्रिया 2020 मेरेन पुराय कित्याक जावंक ना? सरकारांतले कांय मंत्री स्वताच्या सुवार्था खातीर ह्या नोकऱ्यांचो वापर करतात. ही भरती प्रक्रिया रद्द क रून ह्या घोटाळ्यांत आपलो हात ना हे सिद्ध करपाची जापसालदारकी सगळ्या मंत्र्यांची आसा, अशें मोहनदास लोलयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
