भांगरभूंय | प्रतिनिधी
मडगांव : मडगांवच्या कृष्णी ज्वेलर्सचे धनी स्वप्नील वाळके हांच्या २०२० तल्या खून प्रकरणांतलो मुखेल दुबावीत ओंकार पाटील हाका न्यायालयान थाकाय दिवंक ना. हो दरोडो न्हय, तर नियोजन केल्लो खून आशिल्ल्याचें निरीक्षण नोंद करून दक्षीण गोंय जिल्लो सत्र न्यायालयान दुबावीत पाटील हाच्या जामिना खातीर केल्लो अर्ज भायर मारलो.
मडगांवच्या भर बाजारांतल्या दुकानांत घुसून कृष्णी ज्वेलर्सचे धनी स्वप्नील वाळके हांची फार मारून आनी सुर्यान वार करून २ सप्टेंबर २०२० दिसा खून केल्लो. ह्या प्रकरणांत मुस्तफा शेख, इव्हेंडर रॉड्रिग्ज आनी ओंकार पाटील हांचे सयत हेर कांय दुबावितांचेर गुन्यांव दाखल आसा.
आरोपपत्रा प्रमाण, दुबावीत ओंकार पाटील हो ह्या पुराय कटाचो मुखेल भाग आशिल्लो. पुलिसांनी न्यायालयांत सादर केल्ल्या पुराव्यां प्रमाण ओंकार पाटीलान हे दुबावितां वांगडा बिहाराक वचून खुना खातीर वापरिल्लें पिस्तोल विकतें घेतिल्लें. खुना पयलीं दुबावितान मडगांवच्या रावणफोंड हांगा फारपेटीचो सराव केल्लो. जाचे ऑडिओ-व्हिडिओ रेकॉर्डिंग पुलिसांच्या हाताक लागल्यात. ह्या गुन्यांवा खातीर वापरिल्ली बॉलेरो गाडी चोरपाकूय ओंकाराचो हात आशिल्लो, असो आरोप आसा.
ह्या खटल्यां आतां मेरेन सुमार १०० साक्षीदारांची साक्ष जावपाची उरल्या. दुबाविताक जामीन दिल्यार तो साक्षीदारांचेर चेंपण हाडपाक शकता,हो भंय न्यायालयान ग्राह्य धरली. तशेंच सेगीत अर्ज दाखल करून खटल्याक उशीर करता असो ठपकोय न्यायालयान दवरलो.
दुबावीत ओंकार पाटीलान ह्यान पयलीं जायते फावटीं जामिना खातीर यत्न केल्ले. मात गुन्यांवाची खरसाण पळोवन ते भायर मारिल्ले. जामीन अर्जाचेर निर्णय घेतना कळावाचो फायदो दुबाविताक दिवपाक शकना. मरण आयिल्ल्या कुटुंबाच्या हिताचोय विचार करपाक जाय. मरण आयिल्ल्या मनशाची कसलीच चूक नासतना फकत लुटमाराच्या हेतान ताचो खून केलो. हो फकत दरोडो न्हय दिसा उजवाडा केल्लो सुनियोजीत खून, अशें निरीक्षण नोंद करून न्यायालयानन दुबावीत ओंकार हाचो अर्ज भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
