भांगरभूंय | प्रतिनिधी
पणजी ः मडगांव कथित बलात्कार प्रकरणा संबंदी पुलीस अहवाल सादर करतले. कितें चुकीचें घडलां अशें अहवालांत कळ्ळ्यार आमी रस्त्यार देंवून पिडितेक न्याय दितलीं अशी शिटकावणी गोंय प्रदेश काँग्रेसीची बायलां अध्यक्ष डॉ. प्रतिक्षा खलप हांणी दिली. बिरेस्तारा पणजेंत जाल्ले पत्रकार परिशदेंत ती उलयताली. ह्या वेळार ॲड. लवेलिया कोस्टा आनी हेर पदाधिकारी हाजीर आशिल्ले.
मडगांव प्रकरणांत पिडितेन आदल्या दिसा एक जबाब दिल्लो. पूण दुसऱ्या दिसा तिणें आपलो जबाब बदल्लो. आपल्याचेर अत्याचार जावंकूच ना अशें तिणें सांगलें. ती स्वता अशें सांगता जाल्यार आमी कांयच करपाक शकनात. पूण खंयचे परिस्थितींत तिणें जबाब बदल्लो हें मात कळपाक जाय. ह्या प्रकरणाचेर कोण चेंपण हाडपाचो यत्न करता काय? कितें खरें आनी कितें फट हेंय पुलिसांनी स्पश्ट करचें अशें खलप हांणी सांगलें.
अत्याचार वा हिंसाचाराक बळी पडपी बायलां खातीर केंद्र सरकारान वन स्टॉप सेंटर येवजण सुरू केल्या. राज्यांतले वन स्टॉप सेंटर सारकें काम करीना. ह्या प्रकरणांत बायलांचो एकवोट एनजीओची आवडा व्हिएगस हिणें पिडितेक प्रसार माध्यमां मुखार हाडलें. तिणें तोंड धांपलें तरी तशें करपाक परवानगी आसा काय हाचो विचार करचो. तिका प्रसार माध्यमां मुखार हाडचे पयलीं तिची भावनीक स्थिती समजून घेवपाक जाय आशिल्ली, अशेंय तिणें सांगलें.
राज्यांत कायदो आनी सुवेवस्था इबाडटा…
बायलां आड अत्याचार वाडला. फाटल्या वर्सां दर दिसा एके बायलेन पुलिशेंत कागाळ केल्या. समाजाचो भंय आनी हेर कारणांक लागून मुखार येनाशिल्ल्या पिडित बायलांचो आंकडो चड आसपाची शक्यताय आसा. अर्थसंकल्पांत बायलांचे सुरक्षे विशीं तरतूद करप गरजेचें आशिल्लें. बायलांक न्याय दिवपा खातीर काँग्रेस बांदील आसा. हे खातीर पक्षान 3 एप्रीलाक न्याय यात्रा घडोवन हाडल्या अशें खलप हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
