भांगरभूंय | प्रतिनिधी
मडगांवः मडगांव अर्बन बॅंकेंत वट्ट 56635 खातेधारक आसात. तातूंतल्या धा हजार खातेधारकांनी आपले पयशे परतून मेळचे म्हूण अर्ज केल्लो. ह्या अर्जाची दखल घेवन बॅंकेन तांचे पयशे परतून दिले. ज्या लोकांनी भांगराच्यो वस्तू घाणाक दवरिल्ल्यो, पूण तांणी भरले नात त्या भांगराच्या वस्तूंची पावणी 3 ऑगस्टाक करपाचे जाहीर केलां.
मडगांव अर्बन को ऑपरेटिव्ह बॅंकेचेर फाटल्या वर्साच्या ऑगस्ट म्हयन्यांत अर्थीक निर्बंध घाले उपरांत परवानो रद्द करपाचें थारायिल्लें. उपरांत आरबीआयन बॅंकेचेर प्रशासक म्हूण किशोर आमोणकार हांची नेमणूक केल्ली. मे म्हयन्याचे सुरवेक जांणी आपले पयशे परतून मेळपा खातीर अर्ज केल्लो तांचे पयशे परतून दिले. तातूंत पांच लाखा मेरेनचे पयशे पयली दिले. अर्ज केल्ल्या 10 हजार खातेधारकां मदल्या 99 टक्के खातेधारकांक पयशे परतून दिल्यात.
मजगतीं, खूबशा लाॅकरधारकांनी आपल्या लाॅकरांतल्यो वस्तू व्हेरूंक नात तांणी त्यो व्हरच्यो अशें लिक्विडेटर आमोणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
