भांगरभूंय | प्रतिनिधी
मडगाव : मडगांवां बड्ड्यां एका घरांत ड्रग्साचो वेव्हार सुरू आशिल्लो. फातोड्डें पुलिसांनी छापो घालून 1.10 लाखांचो ड्रग्स, 1 लाख रोख आनी एक एअर गन असो माल जप्त केलो. ह्या प्रकरणांतलो दुबावीत टेरेन्स फर्नांडीस हाका पळून वचपाक येस आयलें.
मोड्साय बड्ड्यां घरांत ड्रग्साचो वेवसाय सुरू आशिल्ल्याची म्हायती पुलिसांक मेळिल्ली. ते प्रमाण उपअधीक्षक सिद्धांत शिरोडकार हांच्या मार्गदर्शना खाला निरीक्षक नॅथन आल्मेदा हांणी कारवाय केली. पुलिसांनी सोमारा सांजे वेळार ह्या घराचेर छापो घालो. ह्या वेळार 1.10 लाखांचो 1.100 किलो गांजो, 1 लाख 5600 रुपया, चार टॅब, तीन वजन माप यंत्रां आनी एक एअर गन असो माल जप्त केलो. पुलिसांनी छापो घालो तेन्ना ह्या प्रकरणांतलो दुबावीत टेरेन्स फर्नांडीस हो घराच्या फाटल्या दारांतल्यान पळून गेलो. घुवळे वखदां विरोधी कायद्या खाला गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
