भांगरभूंय | प्रतिनिधी
मडगांव ः गोंय सारस्वत समाजान 7 ते 9 फेब्रुवारी मेरेन ‘सारस्वत फूड अँड कल्चरल फेस्टिवल 2025’ आयोजीत केला. हो महोत्सव मडगांवच्या एसजीपीडीए मैदानाचेर जातलो. हे कार्यावळीत वेगवेगळ्यां खाणा जेवणांचो आनी सांस्कृतीक कार्यावळींचो आस्वाद घेवंक मेळटलो.
मडगांवांत जाल्ले पत्रकार परिशदेंत सारस्वत फूड अँड कल्चरल फेस्टिवला विशीं म्हायती दिली. ह्या वेळार गोंय सारस्वत समाजाचे अध्यक्ष डॉ. देश प्रभुदेसाय, सरचिटणीस नवनाथ खांडेपारकार, खजिनदार राजेश प्रभु, आयोजक समितीचे अध्यक्ष नरेश घोडगे, मठग्रामस्थ सारस्वत समाजाचे अध्यक्ष दामोदर बोरकार आनी उमेश कामत हाजीर आशिल्ले. 7 फेब्रुवारीक सांजवेळा 6 वरांचेर महोत्सवाचें उक्तावण जातलें. ह्या वेळार आमदार दिगंबर कामत, आमदार दाजी साळकार आनी नगरसेवक सगुण नायक हाजीर आसतले. समारोप सुवाळ्याक मुखेल सोयरे म्हूण आमदार विजय सरदेसाय आनी दवर्ली दिकरपाल सरपंच साईश राजाध्यक्ष हाजीर आसतले.
7 फेब्रुवारीक सांजवेळा 4 वरांचेर बेस्ट ऑवट ऑफ वेस्ट सर्त चार गटांनी घडोवन हाडटले. फुलांची सजावट सर्त दोन गटांनी जातली. हाचे भायर माचयेर फॅन्सी ड्रेस सर्त आयोजीत केल्या. सांजवेळा 7 ते 10 मेरेन नाच सर्त जातली.
महोत्सवाच्या दुसऱ्या दिसा 8 तारखेक सांजवेळा 4 वरांचेर फेस पेंटींग, क्रोचेट मेकींग आनी हँड एम्ब्राडरी सर्त आयोजीत केल्या. दनपारां 3:30 वरांचेर माचयेर एअर मार्शल संदेश वागळे हांचे हस्तुकीं विद्यार्थ्यांचो भोवमान करतले. उपरांत सांजवेळा 6 वरांचेर गायन सर्त आयोजीत करतले.
9 फेब्रुवारीक सकाळीं 9.30 वरांचेर भुरग्यां खातीर चित्रकला सर्त जातली. सकाळीं 10:30 वरांचेर व्रॅपिंग आर्ट सर्त आनी सांजवेळा 4 वरांचेर कोंकणी मेजवाणी रांदपाची सर्त आयोजीत केल्या. ते भायर वेवसाय कल्पना सर्त आसतली. हाचे भायर निमाण्या दिसा दनपारां 3 वरांचेर सारस्वत कुमारी आनी कुमार सर्त, मिस्टर आनी मिसेस सारस्वत, मिस सारस्वत, मिस्टर सारस्वत सर्त आयोजीत केल्या. ताचे उपरांत इनामां वाटप सुवाळो जातलो आनी सारस्वत फॅशन शो करून ही कार्यावळ सोंपतली.
सारस्वत महोत्सवाच्या स्थळार सेल्फी घेवपा खातीर खाशेलो बूथ उबारतले. ह्या महोत्सवाक येवपी लोकांक 7 फेब्रुवारी सावन दनपरां 3 मेरेन कुटुंबा वांगडा सेल्फी घेवंक मेळटली. ही सेल्फी धाडून तुमी सर्तींत वांटो घेवंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
