भांगरभूंय | प्रतिनिधी
अन्न आनी वखदां विभागाची कारवाय
भांगरभूंय । प्रतिनिधी
मडगांवः अन्न आनी वखदां विभागा कडल्यान बुधवारा सकाळीं मडगांवच्या कदंबा बस स्टॅण्डा लागसार कारवाय करून गोंया भायल्यान विकपा खातीर हाडिल्लीं सुमार 52 हजार रुपयांचीं पनीर आनी चपात्यांची पाकिटां जप्त केलीं. पाकिटा वयली म्हायती दितना, परवानो नुतनीकरणा संबंदांतले नेम मोडल्यात, हाताळणी ह्या कारणां खातीर ही कारवाय केली.
अन्न आनी वखदां विभागा कडल्यान राजीव कोरडे हांच्या फुडारपणा खाला बुधवारा फांतोडेर 4 वरांच्या सुमाराक मडगांवच्या कदंब बस स्टॅण्डा लागसार पळोवणी केली. थंय होर राज्यांतल्यान आयिल्ल्या खाद्यपदार्थ्यांची तपासणी केली. त्या वेळार दुसऱ्या राज्यांतल्यान आयिल्ल्या चपातींच्या पाकिटां वयल्या लेबला वयले म्हायती संबंदांत खुबशे उणाव दिसले. कसलोच वैजकी पुरावो दिवपा बगर पाकिटा वयले म्हायतींत कोलेस्टॉरेल उणें आशिल्ल्याचो ताचेर दाबो केल्लो. हातूंतल्यान गिरायकांची फटवणूक करतात. ज्या युनिटाचे नंबर थंय आसात, त्या युनिटाचे परवाने नुतनीकरण केल्लें ना वा रद्द केल्ले आसात. पनीरच्या पाकिटा वयली म्हायती लेगीत अशेच तरेन चुकीची आसा. तांचेर दोन- दोन परवानो नंबर आशिल्ले.
अन्न आनी वखदां विभागान बुधवारा केल्ले कारवायेंत 27 हजार रुपयां मोलाचीं चपात्यांचीं पाकिटां आनी 25 हजार रुपयांचीं पनिराचीं पाकिटां जप्त केल्यांत. हे संबंदांत अन्न पदार्थ पुरवण करपी कंपनीं कडेन संपर्क करून तांकां हाची म्हायती दितले आनी गरजेची जतनाय घेवपा विशींची सुचोवणी करतले.
सध्या पावसाचे दीस आसात. दुसऱ्या राज्यांतल्यान आयिल्लो हो म्हाल बशींतल्यान देंवोवन रस्सत्या कुशीक उडयिल्ल्याचें दिसलें. अन्न पदार्थ वा ते खातीर वापरतात त्या पदार्थांची हाताळणी योग्य आसची, हे खातीर लेगीत उपाय येवजण करपाच्यो आनी हाताळणी तशेंच येरादारी संबंदांतल्यो अटी पाळच्यो म्हूण सुचोवण्यो करतले, अशी म्हायती अन्न आनी वखदां विभागाचे दक्षीण गोंयांतले अधिकारी रिचर्ड नोरोन्हा हांणी दिली. हे आदीं म्हापशें बस स्टॅण्डार लेगीत अन्न आनी वखदां विभागान लाखांनी रुपयांचो पनीर जप्त केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
