मडगांवां ८ ते १२ जानेवारी मेरेन फोमेंतो पुरस्कृत विचारवेध व्याख्यानमाळ

भांगरभूंय | प्रतिनिधी

मडगांव : गोमंत विद्या निकेतन मडगांव हांचे वतीन बुधवार ८ ते १२ जानेवारी मेरेन सांजेवेळार स वरांचेर फोमेंतो पुरस्कृत विचारवेध व्याख्यानमाळेचें आयोजन केलां.
गोमंत विद्या निकेतनान पत्रकार परिशदेंत विचारवेध व्याख्यानमाळे विशीं म्हायती दिली. ह्या वेळार सचीव आनंद मासुर, वांगडी अतुल नायक, वांगडी सुहास सडेकार, वांगडी अंजली देसाय हजर आशिल्लीं.
आनंद मासुर हांणी सांगलें, ८ जानेवारीक दत्ता गोविंद पै रायतुरकर व्याख्यानांत पियुष तेवारी हे ‘ड्रायव्हिंग चेंज : हाऊ यंग लिडर्स कॅन एण्ड रोड क्रॅश इपिडेमीक’ ह्या विशयाचेर उलयतले. तेवारी हे भारतीय समाजीक कार्यकर्ते. ते रस्तो सुरक्षा सुधारपा खातीर काम करतात.

९ जानेवारीक श्रीनिवास नायक स्मृती व्याख्यानांत चिन्मयी सुमीत ही ‘मांयभास आनी शिक्षण – संस्काराचे आधारस्तंभ’ ह्या विशयाचेर व्याख्यान दितली. सुमीत ही एक मराठी अभिनेत्री. ती ह्या विशयाचेर जागृताय करता.
१० जानेवारीक दत्तात्रेय एन. हेमाडी स्मृती व्याख्यानांत ‘रानमाणूस’ प्रसाद गावडे हांचें ‘आनंदाचे अर्थकरण’ ह्या विशयाचेर व्याख्यान जातलें. गावडे हांणी कोकणांत परतून गांवगिरी जीवनशैली जीणे कडेन कशी एकरुप आसा, हें प्रत्यक्षांत दाखोवपाक आनी पर्यटनाक नवी दिका मेळपा खातीर काम केलां.

११ तारखेर दामोदर कृष्ण वेर्लेकार व्याख्यानांत मानसी प्रसाद ‘किपिंग इट क्लासिकल : द रिलव्हंट ऑफ म्युझीक इन अवर टायम‘ ह्या विशयाचेर भाशण करतली. प्रसाद ही कर्नाटकांतली एक गायिका. ती संगीत परंपरेचो सांबाळ करतना परंपरीक संगीत आनी नाविन्य हाचेर उलयतले.
१२ जानेवारीक श्रीगौरी सावंत ही ‘मी आणि माझा प्रवास‘ ह्या विशयाचेर उलयतली. सावंत हांणी जायतीं वर्सां तृतीयपंथीयांच्या आनी देहविक्रय करपी बायलां खातीर काम केलां. तृतीयपंथीयांक कुशळटाय, उदरगत आनी पोट चलोवपाच्यो संदी मेळपा खातीर काम करता.
हीं सगळीं व्याख्यानां गोमंत विद्या निकेतनाच्या सभाघरांत सांजेवेळार ६ वरांचेर सुरू जातलीं. साधारणपणान ४५ ते ६० मिनिटांचीं हीं व्याख्यानां आसतलीं. गोमंत विद्या निकेतना वतीन आयोजीत ही २५ वी व्याख्यानमाळ.