भांगरभूंय | प्रतिनिधी
दक्षीण गोंय जिल्लोधिकार्यांचो आदेश
मडगांव : रस्त्या कुशीक उब्यो आशिल्ल्यो बेवारशी गाडयांचे समस्येक लागून येरादारीक आडखळ निर्माण जाता. हे विशीं वास्को आनी मडगांव शारांतल्या येरादारी पुलिसांनी जिल्लोधिकार्यांक अहवाल सादर केल्लो. ते प्रमाण आता मडगांवच्यो ५५ आनी वास्कोच्यो ६० बेवारशी गाडयो काडपाचे आदेश जारी केल्यात. स म्हयन्यांत गाडी धनयांनी आपलें वाहन काडूंक ना जाल्यार तें जप्त करपाची कारवाय करतले.
दक्षीण गोंय जिल्लोधिकारी एग्ना क्लिटस हांचे कडल्यान बेवारशी वाहनांच्या समस्यांचो आढावो घेतिल्लो. रस्त्या कुशीक बर्याच काळा सावन गाडयो उब्यो करून दवरिल्ल्यान येरादारीक आडखळ निर्माण जाता. तशेंच मान्सूनचे फाटभूंयेर रोग पातळपाचीय शक्यताय आसा. ह्या कारणाक लागून बेवारशी गाडयो काडपा खातीर कारवायेचे आदेश जारी केल्यात. मडगांव येरादारी पुलीस निरीक्षक संजय दळवी हांण दक्षीण गोंय जिल्लोधिकार्यांक मार्च म्हयन्यांत साद केल्ल्या अहवालांत हाउसिंग सोसायटी, हॉटेल्स आनी रेस्टॉरंट, हॉस्पिटल, बँकां लागसारा बेवारशी आनी भंगारांतलीं वाहनां उबीं केल्यांत. जाल्यार वास्कोचे येरादारी पुलीस निरीक्षक शैलेश नार्वेंकार हांणीय जिल्लोधिकारी कार्यालयांत सादर केल्ल्या अहवालांत दुचाकी, गाडी अशीं सुमार ६० वाहनां बेवारशी स्थितींत आशिल्ल्याचें दाखोवन दिलां.
दक्षीण गोंय जिल्लोधिकार्यांनी येरादारीक आडखळ हाडपी आनी अपघाताक कारण जावपी ह्या गाडयांचेर कारवायेचे आदेश दिल्यात.
ह्या वाहनांत उदक सांठल्यार जळारां जावन दुयेसां पातळपाचीय शक्यताय आशिल्ल्यान ह्यो गाडयो काडपाची गरज आसा. हाका लागून जिल्लोधिकार्यांनी स म्हयन्यांच्या काळांत ह्या वाहन चालकांनी गाडयो काडूंक ना जाल्यार सरकार त्यो जप्त करतलें आनी ताचे उपरांत गाडयांचेर दावो करपाक मेळचो ना, अशे निर्देश जारी केल्यात.
अशे तरेच्या गाडयांची वळेरी मडगांव आनी वास्को उपजिल्लोधिकारी कार्यालयांत लायल्यात. हे वळेरेंत जांच्यो गाडयो आसतल्यो तांणी उपजिल्लोधिकारी कार्यालयांत कागदपत्रां सादर करचीं अशेंय सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
