भांगरभूंय | प्रतिनिधी
मडगांव, प्रतिनिधी : कलांगण हे संस्थे वतीन रवींद्र भवन मडगांव आनी कला संस्कृती खात्याच्या जोड सहकार्यान कलारंग महोत्सवाचें आयोजन केलें. ह्या वेळार संगीत, नाच आनी नाट्य अशें आविश्कार सादर जातले. हो महोत्सव १२ ते १६ ऑक्टोबर ह्या काळांत जातलो.
रवींद्र भवनाचे अध्यक्ष राजेंद्र तालक हांणी दिल्ले म्हायती प्रमाण, मडगांव वाठारांतल्या सुमार देड हजार भुरग्यांक कलेचें शिक्षण दिता. तांकां आंतरराष्ट्रीय दर्जाच्या कलाकारांची कला पळोवपाक मेळची आनी तांचे कडल्यान उर्बा मेळचे खातीर हो महोत्सव मनयता. कलारंग संस्थेचें हें २६ वें वर्स.
संस्थाध्यक्ष अॅड. राजीव शिंक्रे हांणी सांगलें, मडगांव रवींद्र भवनांत १२ ऑक्टोबराक सांजेवेळार ६.१५ वरांचेर ह्या महोत्सवाचो उक्तावण सुवाळो जातलो. हाका कला आनी संस्कृती मंत्री गोविंद गावडे, आमदार दिगंबर कामत, आमदार विजय सरदेसाय हाजीर रावतले. ह्या वेळार मुंबयचे व्हायोलीन वादक मिलींद रायकार आपली कला सादर करतले. १३ ऑक्टोबराक धारवाडचे गायक व्यंकटेश कुमार हांचें शास्त्रीय गायन, उपरांत कलारंगचे प्रशिक्षणार्थी भरतनाट्यम सादर करतले. १४ तारखेक कुडाळ सिंधुदुर्गची गायिका योगिता रायकार हांच्या गायनाची कार्यावळ, उपरांत डॉ. ऐश्वर्या वॉरिअर्स आनी सहकार्यां कडल्यान मोहिनीअट्टम नाच सादर करले. १५ ऑक्टोबराक प्रायटायम थिएटर्स मुंबय वतीन ‘निर्मि गौहर’ ह्या इंग्लीश नाटकाचें सादरीकरण करतले. १६ वेर महोत्सवाची सांगता जातली. ह्या वेळार काली बिल्ली प्रॉडक्शना वतीन ‘लावण्यवती’ ह्या नृत्य नाटकाचें सादरीकरण जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
