भांगरभूंय | प्रतिनिधी
मडगांव: सायबर गुन्यांवां पसून लोकांक सादूर रावपा खातीर चर्च संस्थेंत कार्यरत आशिल्ल्या पाद्रींनी लोकांक आवाहन करूंक शकतात आनी योग्य मार्गदर्शन करूंक शकतात. सायबर सुरक्षीत गोंय मोहिमे खाला आतां मेरेन 150 पाद्रींक तीन सत्रांनी सायबर गुन्यांवां पसून कशे तरेन सादुरताय बाळगप गरजेची आसा हाचें प्रशिक्षण दिलां अशी म्हायती सायबर फांट्याचे पुलीस निरिक्षक दीपक पेडणेंकार हांणी दिली.
मडगांवां सायबर क्रायम फांट्यान साश्ट आनी वाठारांतल्या चर्च संस्थेच्या पांद्रीं खातीर प्रशिक्षण शिबिराचें आयोजन केल्लें. तीन सत्रांनी हें प्रशिक्षण दिलें. हातूंत सुमार देडशें पाद्रींक सायबर गुन्यांव कशे घडटात आनी ताचे पसून कशे तरेन वाटावं येता हाची म्हायती सायबर क्रायमाचे पुलीस निरिक्षक दीपक पेडणेंकार हांणी दिली.
निरिक्षक पेडणेंकार हांणी सांगलें की, गोंयांतल्या नागरिकांक सायबर गुन्यांवां पसून पयस दवरपा खातीर आनी अर्थीक लुकसाण जावचें न्हय हे खातीर लोकजागृताय करतात. हे खातीर सायबर सुरक्षीत गोंय चळवळ राबयतात. गोंयांत डिजिटल अरेस्ट प्रकरणांत वाड जायत आसा. सद्या कोणतरी व्हॉट्सअॅप कॉल करून पुलीस आशिल्ल्याचें सांगून तुमच्या पार्सलांत घुंवळे वखदां आसात. ते खातीर नागरिकांची सगली म्हायती समजून घेतात आनी उपरांत भिरांत दाखोवन अर्थीक फटवणूक करतात. डिजिटल अरेस्ट ही संकल्पनाच ना आनी अशे तरेचे कसलेच प्रकार पुलिसां कडल्यान जायनात.
सायबर क्रायमांत तीन गजालींचो फायदो फटवणूक करतात ते घेतात. लोकां मदीं भिरांत, निश्काळजीपणा आनी हांयस हाका लागून लोकांची फटवणूक करतात. कांय वेळा चड कळंतराचें (व्याज) हांयस दाखोवन रोखडेच पयशे वाडोवन मेळपाचें हांयस दाखयतात आनी लोक कसलीच विचारपूस करिनासतना लाखांनी रुपयांची गुंतवणूक करतात. बँक, सीबीआय, पुलीस, न्यायाधीश हांचे कडल्यान उलयत आशिल्ल्याचें सांगून भिरांत दाखोवन लुबाडटात अशे तरेन पेडणेंकार हांणी मार्गदर्शन केलें.
तशेंच गांवांतल्या लोकांक चडांत चड सायबर गुन्यांवां विशीं म्हायती दिवन सादुरताय बाळगुपाचें आनी कसलीय फटवणूक जाल्यार 1930 क्रमांकाचेर संपर्क सादचो अशें आवाहनूय निरिक्षक दीपक पेडणेंकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
