भांगरभूंय | प्रतिनिधी
पणजी: आमी शाळेंत प्रादेशीक भाशा शिकतात. पूण सरकारी कामकाजांत वावुरतना आमचे भाशेचो वापर खूब उणो करतात. कोंकणी प्रशिक्षणाचो लाव सरकारी कर्मचार्यांक जातलो, अशें साश्टीचे मामलेदार गौरव गांवकार हांणी सांगलें.
राजभाशा संचालनालय आयोजीत प्रशासनांत राजभाशा ह्या प्रशिक्षणाचे सवे बॅचीचें मडगांवां उक्तावण जालें. ह्या वेळार गौरव गांवकार उलयताले. सुवाळ्याक राजभास संचालक मेघनाथ परब आनी उपसंचालक अनिल सावंत हजर आशिल्ले.
हें प्रशिक्षण गंभीरतायेन घेवचें आनी सगळ्यांनी प्रशासनांत कोंकणीचो वापर करूंक आमकां आदार दिवचो अशें संचालक मेघनाथ परब हांणी सांगलें.
चार दिसांच्या ह्या प्रशिक्षणांत 26 सरकारी कर्मचार्यांनी वांटो घेतला. प्रशिक्षणांत मुळावें कोंकणी व्याकरण, कोंकणी भाशेंतले पत्रवेव्हार, कोंकणींत टिपण, प्रशासकीय उतरावळ आनी संवाद हांचो आसपाव जाता. ह्या आठूय प्रशिक्षणांनी चेतन आचार्य, सुशांत नायक, अनिल सावंत, सेबी फर्नांडीस आनी स्नेहा सबनीस मार्गदर्शन दितात.
सातवे बॅचीचें प्रशिक्षण 16 सप्टेंबर आनी आठवे बॅचीचें प्रशिक्षण 22 सप्टेंबर सावन भाशा संशोधन केंद्र, राजभाशा संचालनालय, पांचवो माळो, जुंता हावज, पणजे सकाळीं 9.30 ते सांजे 5 वरां मेरेन सुरू जातलें.
हें प्रशिक्षण आयोजीत करूंक राजभाशा संचालनालयाचे अनुवादक आनी प्रशासकी कर्मचारी वावुरतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
