भांगरभूंय | प्रतिनिधी
केपें सरकारी म्हाविद्यालयांतल्या आदिवासी विकास समितीचो फुडाकार
भांगरभूंय । प्रतिनिधी
मडगांवः कला, विज्ञान आनी वाणिज्य सरकारी म्हाविद्यालय, केपेंच्या आदिवासी विकास समितीच्या फुडाकारान केंद्र सरकाराच्या रिडिस्कव्हरिंग ट्रायबल क्युझीन ऑफ गोवा प्रकल्पा खाला ‘गोंयच्या कोनां- मुळांचो बाजार 2024’ ह्या नांवां प्रदर्शनाचें आयोजन केलां. हें प्रदर्शन शेनवारा 16 नोव्हेंबराक मडगांवच्या रवीन्द्र भवनांत जातलें. ताचें उक्तावण सकाळीं 10 वरांचेर जातलें. हें प्रदर्शन सांजेच्या 4 वरां मेरेन विक्री खातीर उक्तें आसतलें, अशें आयोजकांनी कळयलां.
गोंयांतल्या आदिवासी समाजांतल्या बायलांक विवीध खाद्यपदार्थांची विक्री करपाक मेळची, तशेंच सार वाठारांतल्या लोकां मदीं आदिवासी समाजान निर्माण केल्ल्या उत्पादनां विशीं जागरुकता निर्माण जावची, हे खातीर प्रदर्शनाचें आयोजन केलां. विवीध तरेचीं कंदमुळां, रताळी, मिरसांग (जीआय टॅग आशिल्ली खोला मिरसांग), शाकभाजी तशेंच गवतीं वखदां ह्या प्रदर्शनांत मेळटलीं.
गोंयांतल्या आदिवासी बायलांह हक्काची माची
‘गोंयच्या कोनां- मुळांचो बाजार 2024’ ह्या प्रदर्शनाच्या माध्यमांतल्यान काणकोण, सांगें, केपें वाठारांतल्या विवीध आपमजत गट आनी बायलांचो व्हड प्रमाणांत आस्पाव ह्या प्रदर्शनांत आसतलो. ह्या प्रदर्शनांतल्यान गोंयांतल्या आदिवासी बायलांक तांणी विकसीत केल्लीं उत्पादनां विकपा खातीर हक्काची माची मेळटली, अशी म्हायती आयोजकांनी दिली.
निरोगी जिविता खातीर फायद्याचीं उत्पादनां
गोंयांतल्या आदिवासी समाजान तयार केल्लीं उत्पादनां जीं पर्यावरणपूरक आनी भलायके खातीर खुबूच फायद्याचीं आसात. तीं सगळीं उत्पादनां एकाच पांख्या खाला प्रदर्शनाच्या माध्यमांतल्यान मेळटलीं. तशेंच हीं उत्पादनां पुराय तरेन सेंद्रीय स्वरुपाचीं आसात, अशेंय आयोजकांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
