भांगरभूंय | प्रतिनिधी
बस स्टॅण्डार अन्न आनी वखदां खात्या कडल्यान कारवाय
भांगरभूंय । प्रतिनिधी
मडगांवः दिवाळी निमितान बाजारांत येवपी अन्नपदार्थांचे फाटभुंयेर अन्न आनी वखदां खात्या कडल्यान साश्ट वाठारांत पळोवणी केली. मडगांव कदंब बस स्टॅण्डार दुसऱ्या राज्यांतल्यान आयिल्लो 56,400 रुपयांचो म्हाल जप्त करून नश्ट केलो.
साश्टींतल्या विवीध मिठाय आनी फरसाण उत्पादकांच्या उत्पादन युनिटांचे नितळसाणी विशींचे परिस्थितीची अन्न आनी वखदां खात्याच्या अधिकाऱ्यांनी सोमारा तपासणी केली. मडगांव कदंब बसस्टॅण्ड वाठारांत तपासणी केली तेन्ना 12 कील खवो आशिल्ल्यो दोन पोतयो चुकीचे पद्दतीन सुक्रोज म्हूण लेबल केले बगर एफएसएसएआय लेबल डिक्लेरेशन दिनासतना योग्य सांठवणूक केले बगर बशींतल्यान येरादारी केल्ली. हो 38,400 रुपयांचो म्हाल जप्त करून सगळ्या वस्तूंचो भौशीक भलायकेच्या हिता खातीर विलो लायलो.
आग्रा पेठ्याचे 16 किलाचे 2 कार्टन बॉक्स आनी बॉम्बे बालव्याचीं दरेकी 30 किलाचीं दोन कार्टन बॉक्सांचेर एफएसएसएआय लेबल नाशिल्लें. तशेंच योग्य सांठवणुके बगर बशीचे डिकींतल्यान येरादारी केल्ली. हो 18 हजारांचो म्हाल लेगीत जप्त केलो. ह्या खाणांचेर दिसाळ्याचे छाप दिसून आयले. हो सांठो लेगीत भौशीक भलायकेचे नदरेन नश्ट केलो.
तशेंच मालभाटांतल्या एका रॅस्टोरंण्टाची तपासणी केली आनी उणाव तत्काळ पयस करपाचे निर्देश दिवन तांकां स्पॉट तपासणी अहवाल दिलो. ते उपरांत मंडोप नावेलीच्या खाद्यपदार्थ उत्पादन युनिटाक भेट दिली. तशेंच वेवसायीक प्लाझांत आशिल्ल्या दुसऱ्या रॅस्टोरंण्टाक लेगीत तपासणी अहवाल दिलो. तांकांय उणाव पयस करपाचे निर्देश दिले. अन्न आनी वखदां खात्याची संचालक श्वेता देसाय हांणी दिल्ले म्हायती प्रमाण सणा परबांच्या काळांत ही मोहीम हे मुखारूय चालू उरतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
