भांगरभूंय | प्रतिनिधी
काणकोण : हांगाचे एके खाजगी मुळावे शाळेंतल्या वर्गांत शिकयतना शिक्षकाचे तकलेर अचकीत फॅन पडिल्ल्याची घडणूक घडली. मात शिक्षकाक कसलीच गंभीर दुखापत जावंक ना. हे घडणुकेक लागून वर्गांतले ल्हान विद्यार्थी बरेच भियेले. हे घडणुके उपरांत विद्यार्थ्यांचे सुरक्षिततायेचो प्रस्न परत मुखार आयला.
मेळिल्ले चड म्हायती प्रमाण, एका वर्गांत शिक्षक शिकयतना ही घडणूक घडली. अचकीत फॅन सकयल पडिल्ल्यान ते कासावीस जाले. तांणी स्वताक सांबाळ्ळे उपरांत परिस्थिती नियंत्रणांत आयली. मात हे घडणुके लागून विद्यार्थ्यां मदीं भंयाचें वातावरण निर्माण जालें. पालकां मदींय हुस्क्याचें वातावरण पातळ्ळां.
सुरक्षे विशीं
शाळेंतल्या सुरक्षा वेवस्थे विशीं चड म्हायती घेतली तेन्ना, खुबश्या शाळांनी उजो पालोवपी यंत्रणां नाशिल्ल्याचें मुखार आयलें. कांय शाळांनी हीं उपकरणां आसात, मात तांची नेमान तपासणी जायना. हाका लागून तीं वापरपाक मेळटलीं काय नात, हो दुबाव.
शिक्षण खात्यान फकत सरकारीच न्हय, खाजगी शाळांच्या इमारतींचीय तपासणी करची. संबंदीत उजो पालोवपी आनी आपत्कालीन सेवा विभागान काणकोण म्हालांतल्या शाळांक बेगोबेग आनी अचकीत भेट दिवन, उजो पालोवपी यंत्रणां सारकी आसात काय ना हाची पडटाळणी करची, अशी मागणी पालक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
