भांगरभूंय | प्रतिनिधी
मडगांव : मडगांव रेल्वे स्टेशना लागसारा आकें वाठारा कुशीक आशिल्ल्या स्टेशनाच्या वाठारांतल्या सिग्नल जंक्शन बॉक्स आनी सरयांक उजो लागिल्ल्याची घडणूक बिरेस्तारा सकाळीं घडली. हे घडणुकेक लागून रेल्वे संप्रेशण प्रणालीचेर परिणाम जालो. कांय गाडयो स्टेशनाचेर थारावन दवरल्यो. ह्या स्ग्निलाचें दुरुस्तीचें काम पुराय जाले उपरांत रेल्वे येरादारी सुरळीत जाली. हे खातीर सुमार तीन वरां लागलीं आनी प्रवाशांकूय बरेच त्रास सोंसचे पडले.
मडगांव रेल्वे स्टेशनावेल्या सिग्नल जंक्शन बॉक्साक उजो लागपाची घडणूक घडली. बिरेस्तारा सकाळीं रेल्वे स्टेशनाच्या आकें वाठारांतल्या अपोलो व्हिक्टर हॉस्पिटला लागसारा रेल्वे वाठारांत कोणेंतरी थंडी पडिल्ल्यान कोयर एकठांय करून उजो घातिल्लो. ह्या उज्याक लागून लागसारच्या रेल्वेच्या सिग्नल जंक्शन बॉक्स आनी सरयांक उजो लागलो. ही घडणूक सकाळीं सुमार पावणेसात वरांचेर घडली. हाची म्हायती रेल्वे प्रशासनाक मेळ्ळे उपरांत तांणी मडगांव उजो पालोवपी दळाक आपयले. उजो पालोवपी दळान उदक मारून उजो पालयलो. हे घडणुकेक लागून रेल्वेची संवाद प्रणाली मानपी रेल्वे संप्रेशण प्रणाली जाका लागून रेल्वे गाडयांक सिग्नल दितात, तातूंत आडखळ आयली. उपरांत कांय गाडयांक सुचवण्यो दिवन फुडल्या स्टेशनाचेर थारायल्यो. सुमार तीन वरांनी रेल्वे प्रशासना वतीन सगळी प्रणाली आदले वरीं केली आनी गाडयोय सुरू केल्यो. हे घडणुकेक लागून प्रवाशांक बरेच त्रास सोंसचे पडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
