भांगरभूंय | प्रतिनिधी
मडगांव : मडगांवां जायतें सुवातेर ’रेंट अ कार’ आनी ’रेंट अ बायक’ पार्क केल्ल्यो दिसतात. पार्कींग सुवातेर ’रेंट अ कार’ लायिल्ल्यान थळाव्यांक वा कामार येवप्यांक आपल्यो गाडयो पार्क करपाक सुवात मेळना. अशे तरेचो व्हिडियो सोशल मिडिया वरवीं व्हायरल जाले उपरांत पुलिसांक जाग आयली. हो जे सुवातेवेलो व्हिडियो आशिल्लो ते सुवातेर येरादारी पुलिसांनी कारवाय केली. हेर सुवातेर केन्ना कारवाय जातली असो प्रस्न नागरिकांक पडला.
मडगांवां पालिका वाठारांत मदले सुवातेर व्हड प्रमाणांत ’रेंट अ कार’ आनी ’रेंट अ बायक’ गाडयांनी सुवात आडायल्या. मडगांव पालिका मंडळा कडल्यान ह्यान पयलीं मडगांव पुलीस, येरादारी पुलीस, आरटीओ हांच्या जोड पालवान घेतिल्ले बसकेंत कारवाय करपाची मागणी केल्ली. मात सप्तकभरा उपरांत परत तीच स्थिती निर्माण जाल्या. मार्केट, पालिका आनी हेर सुवातांचेर कामाक येवप्यांक गाडी पार्क करपाक सुवात मेळना.
बुधवारा सकाळीं हॉटेल ’ला फ्लोर’ लागसारा रस्त्याच्या कुशीक सुमार धा ’रेंट अ कार’ उब्यो आशिल्लो व्हिडिओ व्हायरल जाल्लो. रेंट अ कार लायिल्ल्यान थळाव्यांक गाडी पार्क करपाक मेळना अशे दिसून आयिल्लें. ते भायर लागसरा आशिल्ल्या सर्व्हिसिंग सेंटरावेल्यो गाडयो हे सुवातेर हाडून उब्यो करतात अशी म्हायती कांय रेंट अ कारवाल्यांनी दिली.
संबंदी पार्कींगचो व्हिडिओ व्हायरल जाल्या उपरांत बेगोबेग येरादारी पुलिसांनी घडणूक सुवातेर वचून कारवाय केली. कारवाय उपरांत कांय गाडयो थंयच्यान काडल्यो. मडगांव शारांत अश्यो ’रेंट अ कार’ उब्यो आसतात. तांचेर कारवाय केन्ना करतले असो प्रस्न थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
