भांगरभूंय | प्रतिनिधी
मडगाव : रुमडामळ हावसिंग बोर्डांत चलपी बेकायदेशीर मदरशाचेर मायणा कुडटरी पुलिसांनी कारवाय केली. हातूंत गोंयां सयत कर्नाटक आनी बिहारांतल्या १७ भुरग्यांची सुटका केली. ह्या भुरग्यां कडेन आधारकार्ड वा हेर कागदपत्रां मेळूंक ना. पुलीस फुडलो तपास करतात.
चड म्हायती प्रमाण, अंजुमन हायस्कुलाच्या फाटल्यान आशिल्ले एके निळ्या रंगाचे इमारतींत मदरसो सुरू आशिल्लो. ताका कसलेच तरेची परवानगी नाशिल्ली. पुलिसांक म्हायती मेळटांच सोमारा रातची मदरशाची पळोवणी केली. ह्या वेळार तातूंत वट्ट १७ भुरगीं अशिल्ल्याचें दिसून आयलें. उपरांत पुलिसांनी भुरग्यांचे सुरक्षितताये खातेर बाल कल्याण समिती कडेन संपर्क केलो.
भुरग्यांचेर मानसीक आघात जावचो न्हय म्हणून तांकां रातचे तेच सुवातेर दवरले. पुलिसांनी केल्ले कारवाये उपरांत केल्ल्या तपासांत भुरग्यांचें आधारकार्ड वा हेर कसलेच तरेचीं कागदपत्रां मेळूंक नात. तांची वळख आजून मेळूंक ना. ती सोदपाचें काम चलता. हो मदरसो आदीं सावन चलतालो आनी थळाव्यांचे कागाळी उपरांत ताची सुवात बदल्लीली. हे सुवातेर दुबावीत गजाली जातात असो दुबाव थळाव्यांनी उक्तायिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
