भांगरभूंय | प्रतिनिधी
मडगांव, प्रतिनिधी ः कर्नाटकांतल्यान बीफ हाडिल्ल्याच्या कारणा वेल्यान एसजीपीडीए मार्केटा लागसार चवकशी आनी गाडयेची पळोवणी करपा खातीर गेल्ल्या गोरक्षकांक मारपेट जाल्ल्याची कागाळ तांणी केल्या. जखमी जाल्ल्यांक हॉस्पिटलांत व्हेल्यात. तशेंच थंयच्या विक्रेत्यांनीय बजरंग दलाच्या काय वावुरप्यांनी तीग जाणांक मारपेट केल्ल्याची कागाळ केल्या.
ही घडणूक चिकन मार्केटा लागसार घडली. कर्नाटकांतल्यान बीफाची आयात जाल्ल्याची म्हायती मेळ्ळ्या उपरांत कांय गोरक्षक चवकशी खातीर मार्केटात आयिल्ले. तेन्ना तांणी लोकांक गाडी दाखोवपाक सांगलें आनी मागीर मारपेट जावपाचो प्रकार घडलो.
एसजीपीडीएतली दुकानां बंद करतना विक्रेते कागाळ करपा खातीर फातोड्ड्यां पुलीस स्टेशनांत गेले. विक्रेत्यांच्या म्हणण्या प्रमाण सकाळीं दुकान उगडपाक वतना कांय जाणांनी येवन गाडी उगडून भितर कितें आसा तें दाखोवपाक सांगलें. तेन्ना तुमी कोण अशें तांकां विचारून विक्रेत्यांनी गाडी दाखोवपाक न्हयकार दिलो. ते उपरांत वाद जालो आनी तांणी लोखणाचे वारांव काडून तिगांक मारले. हांतूत अफजल बेपारी, मजीद बेपारी, युनुस बेपारी हें तिग जाण जखमी जाल्ल्याचें तांणी सांगलें.
एसजीपीडीएच्या मार्केटांत कर्नाटकांतल्यान बीफ घेवन गाडी हाडल्या अशी म्हायती मेळ्ळ्या उपरांत गोरक्षक म्हणून थंय तपासणी करपाक गेल्ले अशें भगवान रेडकार हांणी सांगलें. थंय एक गाडी रिती आशिल्ली आनी दोन बंद गाडयो लिपून दवरिल्ल्यो. तांणी गाडयेक हात लेगीत लायलो ना पूण तांकां मारपाक येतात तें पळोवन रस्त्यार उबे रावले आनी पुलिसांक फोन केलो. कांय जाणांनी थंय गोरक्षकांक मारले. हातूंत किरण आचार्य आनी साई मालवणकार जखमी जाल्यात. सध्या तांकां दक्षीण गोंय जिल्हो हॉस्पिटलांत व्हेल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
