भांगरभूंय | प्रतिनिधी
मडगांव : घाणयारें उदक सरळ व्हाळांत सोडिल्ल्या प्रकरणांत नोटीसो दिवन लेगीत तें बंद करिनाशिल्लीं ४६ आस्थापनां बंद करपाचे आदेश उच्च न्यायालयान दिल्ले. ते प्रमाण गोंय प्रदूशण नियंत्रण मंडळान मडगांवचीं २१ आस्थापनां सील केल्लीं. आतां ही कारवाय मुखार व्हरत आनीक चार आस्थापनां सील केल्यांत.
नावेलीच्या सायपे तळ्या सयत साळ न्हंयेंत प्रदूशण जाल्ल्यान हे विशीं उच्च न्यायालयात याचिका दाखल केल्ली. हे विशीं सुनावणे वेळार ज्या आस्थापनांनी घाणयारें उदक सरळ व्हाळांत सोडिल्लें तांकां घाणयार्या उदकाची जोडणी घेवपा वांगडा घाणयारें उदक उक्ताडार सोडचें न्हय अश्यो नोटीसो धाडिल्ल्यो. उपरांत कार्यवाही जावंक नाशिल्ल्यान गोंय प्रदुशण नियंत्रण मंडळाच्या अधिकार्यांनी पुलीस बंदोबस्तांत आस्थापनांक कुलूप लावपाचें काम सुरू केल्लें. फाटल्या सप्तकांत वट्ट २१ दुकानांक सील केल्लें.
पर्यावरण कायदो मोडिल्ल्यांचेर कारवाय चालूच दवरून गोंय राज्य प्रदूशण नियंत्रण मंडळान व्हाळांत घाणयारें उदक सोडिल्ले खातीर दुकानांक सील घालता.
बंद केल्ल्या दुकानांत रेस्टॉरंट आनी हेर दुकानांचो आसपाव आसा. सासष्टीचे मामलेदार विमोद दलाल हांचे हाजेरींत, पुलिसांच्या बंदोबस्तात ही मोहीम राबयली. नेमो मोडिल्ल्या धनयांक तांचे वेवसाय बंद करपाच्यो सुचवण्यो दिल्यात. तशेंच फुडले कारवायेक तोंड दिवचें पडटलें अश्योय सुचवण्यो ह्यान पयलीं दिल्ल्यो. ताचे उपरांतूय गरजेचे उपाय करूंक नाशिल्ल्या आस्थापनांचेर कारवाय करप सुरू आसा. शुक्रारा सकाळच्या सत्रांत प्रदूशण नियंत्रण मंडळान मडगांवां आनी फातोर्डा वाठारांतल्या आनी चार आस्थापनांचेर कारवाय केली.
मजगतीं, गोंय प्रदूशण नियंत्रण मंडळान कारवाय केल्ल्या आस्थापनांक गरजेची परवानगी घेवपा खातीर शुक्रारा दनपरां जिल्लोधिकारी कार्यालयांत विशेश शिबिराचें आयोजन केलां. हातूंत आस्थापनांक वेवसाया खातीर गरजेची परवानगी कागदोपत्री प्रक्रिये उपरांत रोखडीच दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
