भांगरभूंय | प्रतिनिधी
पणजीः मडगांवां तबला वादन प्रशिक्षण वर्गाचें 4 जानेवारीक दबाज्यान उक्तावण जालें. उक्तावण सुवाळ्याची सुरवात संस्थेचे अध्यक्ष सिद्धनाथ बुयांव हांचे हस्तुकीं सरस्वती पुजन आनी दिवली पेटोवन जाली. ह्या वेळार संस्थेचे ज्येश्ठ वांगडी किरण नायक आनी गोंयच्या संगीत मळा वयले मानेस्त हाजीर आशिल्ले.
नामनेचे तबला वादक आनी शिक्षक यतीन तळावलीकार हांणी तबल्याच्या म्हत्वाचेर मार्गदर्शन केलें. ज्येश्ठ गायक आनी संगीत शिक्षक सुभाष प्रभुदेसाय हांणी संगिताचे साधनेंतल्या तबल्याचे भुमिकेचेर खोलायेन विचार मांडले.
संस्थेचे सचीव सुहास सडेकार हांणी सुत्रसंचालन केलें. तांणी वर्गाचें खाशेलपण स्पश्ट करून विद्यार्थ्यांचे सर्वांगी उदरगती खातीर ह्या उपक्रमाचो कसो उपेग जातलो हाची म्हायती दिली. तबल्याच्या माध्यमांतल्यान गोंयचें संगीत दायज सांबाळप आनी नव्या कलाकारांक माची मेळोवन दिवप हो ह्या वर्गाचो मुखेल उद्देश आशिल्ल्याचें तांणी सांगलें.
प्रशिक्षण वर्गांत भुरग्यांक शास्त्रीय संगिताच्यो मुळाव्यो संकल्पना, तालांची वळख आनी तबल्याचें म्हत्व समजावन सांगतलें. ल्हान भुरग्यां पासून जाण्ट्यां मेरेन सगळ्यां खातीर हो वर्ग उक्तो आसतलो. नियमीत कार्यशाळा, तालवाद्य वादन तंत्राचेर सत्रां, तशेंच नामनेच्या कलाकारांचें विशेश मार्गदर्शन विद्यार्थ्यांक मेळटलें. विद्यार्थ्यांक राज्य आनी राष्ट्रीय पांवड्याचेर संगीत सर्तींनी वांटो घेवपाक मार्गदर्शन करतले. प्रशिक्षण पुराय केले उपरांत विद्यार्थ्यांक अधिकृत प्रमाणपत्र दितलें, अशें जाळवणदारांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
