भांगरभूंय | प्रतिनिधी
-सभापती तवडकार, आमदार कामत हांची हाजेरीमडगांवः बीपीएस स्पोर्ट् स क्लबांत आयोजीत केल्ल्या पयल्या गोंय- बेळगांव एक्स्पोचें उक्तावण अध्यक्ष रमेश तवडकार हांचे हस्तुकीं जालें. ह्या वेळार आमदार दिगंबर कामत, कॉमेडियन जॉन डिसिल्वा, बीपीएस क्लबाचे अध्यक्ष योगीराज कामत आनी हेर मानेस्त हाजीर आशिल्ले. एक्स्पोच्या पयल्याच दिसा खरेदी करपाक गिरायकांची गर्दी अाशिल्ली.
गोंय आनी बेळगांवांतल्या वेगवेगळ्या नामनेच्या आस्थापनांच्या सहभागान प्रुडंट मिडिया नेटवर्कान अंदूं नवें प्रदर्शन आनी विक्री उपक्रम सुरू केला. मानेस्तांक ढोल ताश्यांच्या गजरांत मानेस्तांक येवकार दिवन एक्स्पोचें उक्तावण सभापती तवडकार हांणी केलें.
प्रुडंट मिडियान पयलेच खेपे गोंय आनी बेळगांव एक्स्पो घडोवन हाडला आनी चडशीं आस्थापनां एकठांय हाडलीं अशें अध्यक्ष तवडकार हांणी सांगलें. हाका लागून गोंय आनी बेळगांव हांचे मदलो संबंद घटमूट जाला. गोंयकार गिरायकां खातीर ही मेजवानी आसा. गोंयचे जायते लोक खरेदी खातीर बेळगांवां वतात. आतां खरेदी करपाक बेळगांवां वचचे बदला बेळगांवांतल्यान आस्थापनां गोंयांत हाडल्यात. जेवणा सयत वेगवेगळे वस्तू ह्या गिरायकांक आकर्शीत करतले. ह्या एक्स्पोन बेळगांवच्या बऱ्या आस्थापनांची वळख गोंयकारांक मेळ्ळ्या. फुडाराक हो एक्स्पो व्हड प्रमाणांत आयोजीत जातलो अशीय आस्त तांणी उक्तायली.
गोंय – बेळगांव एक्स्पो हो एक वेगळोच प्रकारचो उपक्रम अशें योगीराज कामत हांणी सांगलें. हाचो फायदो गोंयकारांक जातलो आनी तांकां खरेदी करपा खातीर बेळगांवाक वचचें पडचें ना. गोंयच्या वेगवेगळ्या वाठारांनी अशेच तरेचे उपक्रम घडोवन हाडचे. प्रुडंट मिडिया नेटवर्कान बायलां खातीर कार्यावळी घडोवन हाडपाचो फुडाकार घेतला हें तोखणायेचें. प्रुडंट मिडिया नेटवर्कान बेळगांव गोंयांत हाडल्या आनी लोकांक गरजेच्यो सगळ्यो वस्तू हांगा मेळटल्यो अशें जॉन डिसिल्वा हांणी सांगलें. लोकांनी हांगा येवन खरेदी करची. अंदूंच्या एक्स्पोक बरो प्रतिसाद मेळटलो आनी फुडल्या वर्साय व्हडलो एक्स्पो आयोजीत करचो अशेंय तांणी सांगलें.
गोंय आनी बेळगांव हांचे संबंद कितल्याशाच वर्सां सावन आसात अशें आमदार कामत हांणी सांगलें. गोंयचे लोक जायतीं वर्सां खरेदी खातीर बेळगांवां वतात. गोंयचे लोक बेळगांवां वतना पार्किंगाचें पयशें फारीक करतात, पूण गोंयांत पार्किंगाचें पयशें दितना निशेध करतात. बेळगांव आनी मडगांव हांचे मदले संबंद आनीक घटमूट करपा खातीर प्रुडंट मिडिया नेटवर्कान बरो वावर केला. अंदूं गिरायकांचो प्रतिसाद मेळटलो आनी फुडल्या वर्सा आनीक आस्थापनां एक्स्पोंत आसतली अशेंय तांणी सांगलें. ह्या संदर्भात प्रुडंट मिडिया नेटवर्काचे वेगवेगळे अधिकारी आनी कर्मचारी हाजीर आशिल्ले. रोहित हांणी सुत्रसंचालन केेले.
—————-
11 जानेवारी मेरेन एक्स्पो सुरू आसतलें
बेळगांवां खरेदी करपाक वचपी लोकांक आतां गोंयांत खरेदी करपाक मेळटली, तांकां बेळगांव वचपाची गरज पडची ना. हे खातीर प्रुडंट मिडिया नेटवर्क 11 जानेवारी मेरेन मडगांवच्या बीपीएस स्पोर्ट्स क्लबांत गोंय – बेळगांव एक्स्पो घडोवन हाडटा. हें प्रदर्शन आनी विक्री सकाळीं 11 ते रातीं 9 मेरेन गिरायकां खातीर उक्तीं आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
