भांगरभूंय | प्रतिनिधी
मडगांव: अन्न आनी वखदां खात्या वतीन मडगांवां पुलीस मुख्यालया मुखार खाद्यपदार्थांची विक्री करपी गाड्यांची तपासणी केली. ह्या वेळार परवानो दाखोवंक नाशिल्ल्यान खाद्यपदार्थ विकतना गरजेच्या नेमांक पाळो दिवंक नाशिल्ल्यान नोटीस जारी केल्या.
अन्न आनी वखदां खात्या वतीन बुधवारा सांजवेळा स वरांच्या सुमाराक दक्षीण गोंय पुलीस मुख्यालयाच्या मुखा वेल्या पोरण्या बस स्टॅण्डा कडल्या खाद्यपदार्थांच्या गाड्यांची तपासणी केली. ह्या वेळार स्टॉला मुखार नो स्मोकींग फलक नाशिल्ल्यान तो फलक लावपाची सुचोवणी केली.
तशेंच अन्नपदार्थ दिसाळ्याच्या कागदांतल्यान बांदून दिवचे न्हय अशी सुचोवणी केली. तशेंच गाड्या खातीर वापरतात त्या उदकाची तपासणी केली. नितळ नाशिल्ल्यो उदकाच्यो बाटल्यो रित्यो केल्यो. तशेंच हाचे मुखार नितळ उदकाच्यो बाटल्यो वारपाची सुचोवणी केली. अन्न आनी वखदां खात्या वतीन अन्न विकपा खातीर केल्ल्या नेमांक पाळो दिवपाक सांगलें.
तशेंच कांय गाड्यांचेर समोसा आनी हेर साहित्य दवरिल्लें दिसून आयलें, ताचीय तपासणी केली आनी हाचे मुखार अन्नपदार्थ सांठोवन दवरपा खातीर योग्य सुवात वापरपाक सांगलें. ह्या वेळार नेमाक पाळो दिवंक नाशिल्ल्याचें दिसून आयल्यार गाड्यांक नोटीस जारी करतले. ज्या गाड्यांनी वेवसाय आनी नितळसाण परवानो दाखयलो ना तांकां कचेरेंत येवन सदर परवान्याची प्रत सादर करपाच्यो सुचोवण्यो केल्यात. अन्नपदार्थ विकपाचे सुवातेर नितळसाण दिसून आयली ना, तांकां नितळसाण राखपाक सांगलां आनी नोटीस जारी केल्या. फुडले फावटी दंडात्मक कारवाय करतले अशें अधिकारी संज्योत कुडाळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
