भांगरभूंय | प्रतिनिधी
मडगांव: गोंयची अर्थीक राजधानी आशिल्ल्या मडगांव शारांत चोरांचो सुळसुळाट वाडला. मंगळारा फांतोडेर अनवळख्या चोरांनी शारांतल्या तीन वेगळ्या वेगळ्या दुकानांक लक्ष्य केलें. हे चोरयेक लागून वेपाऱ्यां मदीं भिरांतीचें आनी तिडकीचें ल्हार पातळ्ळां.
चोरांनी दुकानांचे शटर बागोवन भितर प्रवेश केलो. मेळिल्ले म्हायती प्रमाण सीसीटीव्ही कॅमेऱ्यां पसून वाटावपा खातीर चोरांनी विशेश खबरदारी घेतिल्ली. तिनूय दुकानांल्यान मेळून रोख रक्कम आनी कांय मोलादीक वस्तू चोरांनी चोरून व्हेल्यो. ही चोरी मडगांव न्यू मार्केट आनी आशिकुशीच्या गजबजिल्ल्या भागांत जाली. जंय रातच्या वेळार सुरक्षा वेवस्था उणी आशिल्ल्याचें मुखार आयलां.
वेपाऱ्यांची मागणी
सेगीत जावपी ह्या चोरयेच्या प्रकाराक लागून मडगांव वेपारी संघटणेन आक्रमक भुमिका घेतल्या. आमी नेमान कर भरतात तरी लेगीत मालत्तेची सुरक्षा रामभरोसे आसा अशी भावना एका पिडीत दुकानदारान उक्तायली. पुलिसांनी रातची गस्त वाडोवची आनी मुखेलपणान बाजारपेठेंत सीसीटीव्ही यंत्रणा अदीक सक्षम करची अशी मागणी केली.
मडगांव पुलिसांनी घडणूक थळार पावून पंचनामो केलो. ठशे तज्ञ आनी वास घेवपी सुण्यांचे मजतीन चोरांचो माग काडपाचो यत्न केलो. आमी आशिकुशीच्याे सगल्यो सीसीटीव्ही फुटीजी तपाशीत आसात आनी रोखडेच चोरांक अटक करतले अशें पुलीस गोपांनी सांगलें.
ही चोरी प्लास्टीक वस्तू विक्री, इलेक्ट्रॉनीक आनी कपड्यांच्या दुकानांत जाली आनी 75 हजारांचो म्हालवज चोरयेक गेल्ल्याचें समजता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
