भांगरभूंय | प्रतिनिधी
मडगांवः मडगांवच्या ठोक नुस्त्याच्या बाजाराचें बांदकाम पुराय जालां तरी नुस्तेमारां खातीर गरजेच्यो सुविधा आनी नितळसाण पुराय जाले उपरांतूच ऑक्टोबराच्या निमाणे मेरेन बाजार उगडटले अशी म्हायती एसजीपीडीएचे अध्यक्ष दाजी साळकार हांणी दिल्या.
एसजीपीडीएच्या ठोक नुस्त्याच्या बाजाराचे इमारतीचें बांदकाम पुराय जालां. तशेंच रंगकाम आनी लायटीचींय कामां पुराय जाल्यांत. मात, ह्यान पयलीं दोन ते तीन फावटीं मार्केट सुरू जावपाचें आसा अशें सांगूनय कांय कारणांक लागून तें उक्तें करूंक नाशिल्लें. सध्या जंय नुस्तें अनलोड करतात, थंय नितळसाण नाशिल्ल्यान नुस्तेंमार्यां वांगडा गिरायकांकूय वचप त्रासाचें थारता. तशेंच, नुस्त्याच्या ट्रकांतलें घाणयारें उदक व्हांवून वचपाची वेवस्था नाशिल्ल्यान घाणयारो वास सगल्याक पातळटा.
एसजीपीडीएचे अध्यक्ष दाजी साळकार हांकां हे विशीं विचारलें तेन्ना, बाजार बरो बांदला. नुस्तेमारांक बरें वातावरण मेळचें म्हणून देखरेखीचें काम पुराय जाले उपरांतूच बाजार उगडटले, अशें तांणी सांगलें.
एसजीपीडीएच्या बसकेंत मडगांवचे आमदार तशेंच मंत्री दिगंबर कामत आनी फातोर्डाचे आमदार विजय सरदेसाय हांणीय सगल्या सुविधांयो पुराय जाले बगर मार्केट उक्तें करचे नात अश्यो सुचवण्यो दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
