भांगरभूंय | प्रतिनिधी
भांगरभूंय । प्रतिनिधी
मडगांव: गोमंत विद्या निकेतन हे संस्थेचो 111 वो वर्धापन दीस शेनवार 25 आनी आयतार 26 मार्चाक तरेकवार कार्यावळींनी मनयतले.. मुखेल कार्यावळीक मुखेल सोयरे म्हणून लोकसत्ता दिसाळ्याच्या पुणे आवृत्तीचो निवासी संपादक. मुकूंद संगोराम हाजीर रावतले. पत्रकारिते वांगडा संगीत मळार वावुरपी संगोराम हे पुण्याच्या सवाई गंधर्व संगीत महोत्सवाच्या कार्यकारी मंडळाचेर लेगीत आसात. हालींच तांचे ‘सूरश्रेष्ठ’ हें पुस्तक प्रकाशीत जालां.
,25 मार्चाक सांजेच्या 5.30 वरांचेर संस्थेच्या फॉमेंतो एम्फीथिएटरांत संस्थेच्या अंदूच्या साहित्य पुरस्कारांचें वितरण कवी प्रकाश होळकर हांचे हस्तुकीं जातलें. विशेश म्हटल्यार होळकर हे संस्थेच्या सर्गेस्त. दामोदर अच्युत कारे यादस्तीक गोमंतदेवी या पुरस्काराचे मानकरी आसात.. गोंयच्या नवोदीत, साहित्यिकांक तांचें मार्गदर्शनाची संद मेळटली.
वर्धापनदीसाची मुखेल कार्यावळ आयतारा, 26 मार्चाक सांजेच्या 5.30 वरांचेर फॉमेंतो एम्फीथिएटरांत जातली. मुकूंद संगोराम हाचे हस्तुकीं संस्थेच्या चार वार्शीक पुरस्कारांचे वितरण जातलें. .अभिजीत प्रभुदेसाय ( केशव अनंत नायक यादस्तिक समाजसेवक पुरस्कार), चेतना चेरिटेबल ट्र्स्ट पुरस्कार ( काशिनाथ दामोदर नायक यादस्तिक सामाजीक कृतज्ञता पुरस्कार – संस्था ), प्रकाश होळकर ( कविवर्य दामोदर अच्युत कारे यादस्तिक गोमंतदेवी पुरस्कार ), श्रीमती वर्मा डिमॅलो (पिरुबाय दलाल यादस्तिक ‘स्वयंसिध्दा’ पुरस्कार ) हे तांचे मानकरी आसात.
कोरोना म्हामारीक लागून 2021 वर्सा संस्थेचो वर्धापनदीस मनोवपाक मेळ्ळो ना. अदूचो 111 वो वर्धापदीस दबाज्यान मनयतले. साहित्य मोगींनी व्हडा संख्येन कार्यावळीक हाजीर रावचें अशें संस्थेच्या जाळवणदारांनी मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
