भांगरभूंय | प्रतिनिधी
भांगरभूंय । प्रतिनिधी
मडगांव : गोंयची वेगळी वळख, भास आनी संस्कृती निर्णयकपणान सांबाळपी 1967 च्या इतिहासीक जनमत कौलाक 60 वर्सां पुराय जातात. ते निमतान मडगांवचो आवाज 16 जानेवारी 2026 ते 16 जानेवारी 2027 ह्या काळांत ‘अस्मिताय वर्स’ मनयतले. ह्या वर्सभराच्या उपक्रमांतल्यान जनमत कौल चळवळींतल्या म्हालगड्या तशेंच गोंयचे अस्मिताये खातीर ठामपणान उबे राविल्ल्यांच्या कुटुंबांचो भोवमान करतले, अशी म्हायती युवी फुडारी प्रभव नायक हांणी दिली.
अस्मिताय वर्सा खाला वर्सभर लोकाभिमुख कार्यावळींचें आयोजन करतले. तातूंत भौशीक चर्चा, परिसंवाद, सर्ती आनी विवीध सांस्कृतीक तशेंच लोकांचो वांटो आशिल्ल्या कार्यावळींचो आस्पाव आसतलो. ह्या उपक्रमा वरवीं इतिहासीक जनमत कौलाचो उगडास करून दिवन ताचें म्हत्व नवे पिळगे मेरेन पावोवपाचो यत्न करतले.
शुक्रारा 16 जानेवारी 2026 ह्या दिसा 60 वो जनमत कौल दीस मनयतले. त्या दिसा जनमत कौल चळवळींतले एक मुखेल फुडारी अॅड. उदय भेंब्रे हांचे हस्तुकीं विशेश यादस्तिका पोस्टराचें लोकार्पण करतले, अशी म्हायती प्रभव नायक हांणी दिली.
ह्या वेळार जनमत कौल चळवळींतले जिवीत आशिल्ल्या म्हालगड्यांचें गोंयची वळख तिगोवन दवरचे खातीर दिल्ल्या मोलादीक योगदाना खातीर भोवमान करतले. ह्या मानेस्तां मदीं अॅड. उदय भेंब्रे, प्रा. श्याम वेरेंकार, एन. शिवदास, अरुणा तेलंग, निर्मला सावंत, सदानंद काणेकार, तोमाझून कार्दोज आनी स्मृती अवदी हांचो आस्पाव आसा.
जनमत कौल हो फक्त एक राजकी निर्णय नाशिल्लो, जाल्यार गोंयची संस्कृती, मुल्यां आनी लोकशाय आत्म्याचें प्रतिबिंब आशिल्ली लोकचळवळ आशिल्ली. ह्या म्हालगड्यांचो त्याग आनी ठाम भुमिकेक लागुनूच गोंयची स्वतंत्र वळख तिगून उरली, अशें प्रभव नायक हांणी सांगलें. तशेंच हे इतिहासीक चळवळींत आपलो पणजो नरसिंह नायक आनी आजो अनंत उर्फ बाबू नायक हांचें योगदान आशिल्लें, ताचो आपल्याक अभिमान दिसता, अशेंय तांणी सांगलें. अस्मिताय वर्सा खाला जावपी उपक्रमांचो उद्देश तरणाट्यां मदीं जनजागृती करप, गोंयचे अस्मितायेचेर व्यापक भौशीक संवाद घडोवन हाडप आनी फुडारांत गोंयची सांस्कृतीक, भाशीक आनी समाजीक वीण सांबाळपा खातीर सामुहीत जापसालदारकेची भावना निर्माण करप हो आसा. अस्मिताय वर्स खऱ्या अर्थान लोकचळवळ करचे खातीर लोकांनी आनी संस्थांनी सक्रीय वांटो घेवचो, असो उलो मडगांवचो आवाज वतीन प्रभव नायक हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
