भांगरभूंय | प्रतिनिधी
गोंयकारांक विदेश नवो न्हय. शेंकड्यांनी वर्सां सावन गोंयकार भायर भोंवत आसात. जायते जाण भायल्यान आयले काय, थंय कितली नितळसाण आसा, रस्ते कितले चकचकीत, ल्हान भुरगो पसून कागदाचो कुडको कोयरा पेटयेंत उडयता, सुण्यान घाण केल्यार ताका भोंवडावंक व्हरप्याक ती काडची पडटा…. अशे सांगतना थकनात. तांणी पळयलां तातूंत बरेंच तथ्य आसता. मात तेच लोक मायदेशांत आयले काय तशे वागनात. तातूंत गोंयांत भायल्या गांवांतल्यान वेगM;वेगळे फाटभुंयेचे लोक आयल्यात, तेय बुरशेपणा करतात. पान खावन पिचकारी मारप हो तांचो आवडटो छंद. खंयचेय इमारतीचो कोनसो पळयल्यार आमची भारतीयांची ही चित्रकारी पळोवपाक मेळटली. घाणयारें उदक, सिवरेज, उश्टें, कोयर हांचे बाबतिंतूय आमकां हेंच चित्र दिसतलें. हालींच मडगांवां घाणयाऱ्या उदकाची जोडणी घेवंक ना, म्हूण कांय हाॅटेलां सील केल्यांत. जोडणी घेवपाचो आमी उलो मारिल्लो, प्रदुशण करपी हाॅटेलांक नोटिसोय धाडिल्ल्यो, अशें पालिकेचें मत, तर पायपां घालपाक कळाव जाल्ल्यान आमकां जोडणी मेळूंक ना, अशें हाॅटेलकार सांगतात.
उदका प्रतिबंध आनी प्रदुशण नियंत्रण कायद्या प्रमाण, खंयच्याच वेवसायाक भौशीक जाग्याचेर बुरशेपणा, प्रदुशण करपाक मेळना. दरेका हाॅटेलाक, आस्थापनाक घाणयाऱ्या उदकाची जोडणी, सिवरेज लायन ही घेवचीच पडटा. मात, गोंयांतल्या गांवांनी, शारांनीय कोयर रस्त्यार वा भौशीक जाग्यार उडोवप पयलीं सावन चालूच आसा. पणजी कदंब बस स्टॅण्ड हें ताचें जिवें उदाहरण. ताचेर पीएचडी पसून करूं येता. थंय पावतकच पयलीं मुताच्यो खातसाणी नाकांत घुसतात. मागीर मेळटा थंय दिसपी कोयर. तो खावपाक आयिल्ले कावळे, पारवे, सुणें, गोरवां. हालींच्या कांय म्हयन्यांनी बस स्टॅण्डाचो विस्तार जाल्ल्यान कोयराचें हें साम्राज्य बरेंच उणें जालां. वेपारी, वेवसायीक मेळत थंय कोयर उडयतात काय पालिका तो वेळारूच उखलिना, तें कळना. विचारूंक गेल्यार दोगूय एकमेकां कडेन बोट दाखयतले. ही आमची भारतीय परंपराच! एकामेकांचे तकलेर बुडकुलो फोडलो काय प्रस्न विचारप्याच्या तोंडाक ताळें लागता… मात समस्या आसा तशीच आनी थंयच उरता. पालिका, पंचायतींनी खरें म्हणल्यार थारावीक वेळाचेर कोयर उखलूंक जाय. वेवसायिकांनीय तो ताचे पयलीं हाडून बल्लांत रकोवंक जाय. उपरांत थंय कोणे कोयर केल्यार ताका दंड घालपाक जाय. हें जातलें तेन्नाच लोकांक शिस्त लागतली.
गोंयांत रस्त्यांच्या कुशीक कोयर उडयिल्लो दिसता. थंय सीसीटीव्ही कॅमेरै बसोवन वा रातची गस्त घालून ह्या कोयरकारांक उखलून बंदखणींत उडोवंक फावो. दुसरे दीस तांकां शारांतलो कोयर नितळ करपाची ख्यास्त दिवं येता. नाय जाल्यार हालीं अपघात करप्यांक निबंद बरोवपाची ख्यास्त दितातूच! रस्त्या कुशीच्या कोयरांत कितें खावपाक मेळटलें हे आशेन आयिल्ल्याे गायी, म्हशी, बैलांक, सुण्यांक, सुकण्यांक प्लास्टीक माल पडटा. ह्या जनावरांक लागून अपघातूय जातात. तरीय आमी सुदरनात. पालिकेक म्हयन्याक 25 रुपया दिवचे पडटले म्हूण 40 रुपयांचें पेत्रोल खर्च करून पयस कोण ना थंय व्हरून कोयर उडयतात आनी फुज्जो मारतात. तशें ह्या कोयरान आतां वेवसायाचें रुप घेतलां, ही गजालूय न्हयकारूं येवची ना.
मडगांवां सगल्या हाॅटेल धनयांनी खंय घाणयाऱ्या उदकाचे जोडणे खातीर अर्ज केला. पूण पायपां घालपाच्या कामाक कळाव जाल्ल्यान जोडणी मेळूंक ना. सरकारी खात्यां मदीं समन्वय ना, ताचो फटको आमकां बसता, असो तांचो दावो. ते वटेन पालिका म्हणटा, तांकां पयलीं सगलें कितें सांगिल्लें. हें घाणयारें उदक मुखार नावेलेच्या शेतांनी वता. फुडें साळ न्हंयेंत देंवता. ही न्हंय सामकी प्रदुशीत जाल्या. हे संबंदी उच्च न्यायालयांत याचिका दाखल जाल्ली. ताचेर गरजेची कारवाय करपाची सुचोवणी न्यायालयान पालिकेक दिल्ली. खंयचीय गजाल सुरू करचे पयलीं फुडलें चितपाक जाय. विदेशांत खंय गाडी घेवचे पयलीं कारधनयाक ती पार्क करपाचो जागो दाखोवचो पडटा. आमचे कडेन कसलोय वेवसाय सुरू करचे पयलींच पार्किंगेचो जागो, कोयर उडोवपाचो जागो, घाणयारें उदक, सिवरेज जोडणी हांची तजवीज करप शक्य ना? लोकांक ताच्या
वेवसायाचो त्रास जावचो ना मूं, हेंय पळोवपाक जाय. पूण हांगा
तें जायना. मागीर सरकारी प्रशासनाचे हात ओले करून कांय जाण वेवसाय चलयतात नाजाल्यार न्यायालयान बडी मारली काय जागे जातात. आतां मडगांव पालिका आनी हाॅटेल
धनयांनी मेळून हो प्रस्न बेगीन सुटावो करचो. कारण तो
प्रदुशणा कडेन संबंदीत आसा… आनी वेवसाय चड दीस बंद उरपूय समा न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
