भांगरभूंय | प्रतिनिधी
भांगरभूंय । प्रतिनिधी
मडगांवः मडगांवचें रवींद्र भवन हें भाजपाच्या वावुरप्यांचें पुनर्वसन करपाचें केंद्र जाला. रवींद्र भवन कार्यकारिणीचेर घेतिल्ल्या वांगड्यांक कला आनी संस्कृतीचो मातून गंध ना असो आरोप करून कला आनी संस्कृती कडेन संबंदीत आशिल्ल्या दरेका वांगड्याची म्हायती सरकारान उक्ती करची अशी मागणी काँग्रेसची जिल्हो पंचायत वांगडी मिशेल रिबेलो हिणे केल्या.
मडगांवांतले रवींद्र भवन पुराय साश्ट तालुक्या खातीर आसा. मडगांव नगरपालिका वाठारांतल्या तीन आमदारांनी शिफारस केल्ल्या तियात्रांकूच रवींद्र भवनाचो अध्यक्ष राजेंद्र तालक सभाघर दितात. साश्टींतल्या सगल्या आमदारांनी केल्ल्या शिफारशींक ताणे पाळो दिवपाक जाय अशें रिबेलो हिणे सांगलां. राजेंद्र तालक संगीत आनी नाचाचे क्लास घेवपी एक खाजगी संस्थे कडेन संबंदीत आसा. ताका लागून रवींद्र भवन संगीत, नाच आनी नाट्य प्रशिक्षण वर्ग घेवपाक मेळना असोय आरोप तिणे केला. भुरगीं आनी तरणाट्यां खाती 1 एप्रील सावन रवींद्र भवनान संगीत, नाच आनी नाट्य प्रशिक्षण वर्ग घेवचे तशें केलें ना जाल्यार आंदोलन करपाची शिटकावणी तिणे दिल्या.
रवींद्र भवनान बायलो दिसा निमतान आयोजीत केल्ल्या संगीत मैफली खातीर महाराष्ट्रांतल्या साधना सरगम, वैशाली सामंत आनी आनंदी जोशी हाकां सादरीकरणाची संद दिल्ली. महाराष्ट्रांतल्या कलाकारांक हाडपाक गोंयांत कलाकार ना काय किदें, असो प्रस्न विचारून गोंयांतल्या कलाकारां कडल्यान कमिशन मेळना देखून तांकां सादरीकरणाची संद दिनात अशें तिणे सांगलें. रवींद्र भवनान बायलांच्या दिसा खातीर गोंयच्या लॉर्ना वा हेमा सरदेसाय हांकां कित्याक संद दिली ना, अशे तिणे विचारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
