भांगरभूंय | प्रतिनिधी
दक्षीण गोंय जिल्लोधिकार्यांचे आदेश
मडगांव : मडगांवच्या सिने लता वाठारांत आशिल्ली होली फॅमिली हाऊस ही इमारत धोको निर्माण करपी परिस्थितींत आसा. थंय सुरू आशिल्लीं वेवसायीक आस्थापनां २४ वरांनी बंद करून इमारत रिती करची, अशे आदेश दक्षीण गोंय जिल्लोधिकार्यांनी दिल्यात. तशेंच सुरक्षिततायेचे नदरेन कितेंय उपाय करपाच्यो सुचवण्यो येरादारी पुलिसांक केल्यात.
मडगांवां सिने लता लागसारच्या होली फॅमिली हावज नांवाचे इमारतीचे कांय भाग कोसळपाची कागाळ जिल्लोधिकारी कार्यालयांत केल्या. ही इमारत जीर्ण अवस्थेंत आशिल्ल्यान इमारतींत रावपी मनशां खातीर तशेंच इमारती लागसारच्यान वचपी वा भेट दिवपी मनशां खातीर धोक्याची थारपाक शकता. तशेंच ही रचणूक रावपा खातीर न्हय, वेवसायीक क्रियाकलपां खातीर वापरता. फातिमा प्रीसी आंताव हांणी ईमेला वरवीं होली फॅमिली हावज इमारतीचो सुरक्षा तपासणी अहवाल १५ ऑक्टोबर २०२४ दिसा सादर करीत इमारतीची घटमूटसाण आनी स्थिरताय समाधानी नाशिल्ल्यान ती मोडपाक शकता अशें कळयलां. इमारतीचे स्लॅब सॉफिट, बाह्य बाल्कनी आनी व्हरांड्यांतल्यान कॉंक्रीट सेगीत पडिल्ल्यान इमारतींत रावतल्यांक अपघात जावपाक शकता. इमारतीची स्थिती सामकी बाबत आनी अस्थीर आसा, म्हणून इमारत सुरक्षितपणान मोडप बरें अशें स्ट्रक्चरल ऑडिटान म्हणलां. २४ मे २०२५ दिसा होली फॅमिली हावज इमारतीचे माळयेर सज्जाचो एक भाग कोसळ्ळा, जाल्यार कांय भाग परत १० जून २०२५ दिसा रातचो सुमार ८.३० वरांचेर कोसळ्ळो. सध्याचे स्थितीक लागून हो भौशीक सुरक्षितताये खातीर गंभीर धोका निर्माण जाला, हाका लागून बेगोबेग प्रतिबंधात्मक आनी सुधारात्मक कारवाय गरजेची आशिल्ल्याचें जिल्लोधिकार्यांनी आदेशांत नमूद केलें.
दक्षीण गोंय जिल्लोधिकारी तशेंच जिल्लो आपत्ती वेवस्थापन अध्यक्ष एग्ना क्लीटस हांणी आदेश जारी करीत ही इमारत रिती करपाचे आदेश मामलेदारांक दिल्यात. हो आदेश मेळिल्ल्याक सिने लता, मडगांवां मुखार होली फॅमिली हावजाच्या वाठारांत विवीध वेवसायीक उपक्रम राबोवपी रावतल्यांक २४ वरां भितर काडात आनी पायर्यां सयत सगलीं प्रवेश दारां सील करात. मडगांव पुलीस निरीक्षकांनी पुलीस बंदोबस्त दवरचो. मडगांव येरादारी पुलिसांनी इमारतीच्या वाठारांत कसलेंच वाहन उबें रावंक ना आनी प्रभावीत वाठारा कडेन शिटकावणी तखटो उबारप, हाचे वांगडा रोखडोच प्रभावान घडणुके सुवातेर सगल्यो गरजेच्यो उपाय येवजण्यो करच्यो. ह्या निर्देशांची अंमलबजावणी सुरळीत आनी वेगान करपा खातीर थळावी नगरपालिका अधिकार्यां कडेन समन्वय सादचो. संबंदीत विभागांनी ह्या निर्देशांची अंमलबजावणी जाले उपरांत जिल्लो आपत्ती वेवस्थापन प्राधिकरण हांकां अहवाल सादर करपाच्यो सुचवण्यो जिल्लोधिकार्यांनी केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
