भांगरभूंय | प्रतिनिधी
पुरयत आनी बायलांची एकामेका आड पुलीस कागाळ
भांगरभूंय । प्रतिनिधी
फोंडें: मडकयच्या नवदुर्गा देवस्थानांत सोमारा सकालीं संपोक्षण नमी दिसा व्हट भरपा वेळार वाठारांत तणाव निर्माण जालो. देवळाचे पुरयत विभव गैसास हाणें आपल्याक सनथ नायक आनी प्रतीक नायक हांणी मारबडय केल्ल्याची कागाळ दिले उपरांत मडकयच्या बायलांनी सिंधुराज गैसास, श्रीदत्त गैसास आनी आदित्य गैसास ह्या तीन पुरयता आड धक्काबुक्की केल्ल्याची कागाळ म्हाड्डोऴ पुलीस स्टेशनार केल्या. वाठारांत सकाळच्यान रातीं उसरां मेरेन खर पुलीस बंदोबस्त दवरिल्लो.
सोमारा सकाळीं देवळांत सकाळच्यान व्हट भरपा खातीर व्हड संख्येन बायलो रांकेंत उब्यो आशिल्ल्यो. त्या वेळार अचकीत देवळांत वाद जालो. जात्रे वेळार जमा जाल्लें साहित्य दुसरे सुवातेर दवरपा खातीर लोक पुरयतांक मजत करतात. सोमारा लेगीत जमा जाल्लें साहित्य कुशीक दवरचे खातीर लोक देवळांत गेल्ले. पूण गैरसमज जाल्ल्यान वाद निर्माण जालो. ते उपरांत देवळांतल्यान घरा वचपी विभव गैसास हाका अज्ञातांनी मारबडय केली. पूण कांय वेळा भितर ताणें सनथ नायक आनी प्रतीक नायक हाणें मारबडय केल्ल्याची कागाळ पुलीस स्टेशनार केली.
देवळाचो पुरयत गौरव गैसास हाणें घेतिल्ले पत्रकार परिशदेंत सांगलें, नवदुर्गा देवीची मूर्त बदलपाक विरोध आशिल्ल्यान नवदुर्गा प्रतिष्ठानाक आदार केलो. फुडारांत लेगीत मूर्त बदलपाक विरोध आसतलो. पूण नवदुर्गा प्रतिष्ठानाच्या हेर गजालींक मात तेंको दिवचे नात. सोमारा सकाळीं देवळांतलें साहित्य झोमून व्हरपाचो यत्न कांय जाणांनी केल्ल्यान वाद जालो. ते खातीर देवळांतल्यान घरा वचपी विभव घैसास हाका प्रतीक नायक आनी सनथ नायक हांणी मारबडय केल्ल्याची कागाळ पुलीस स्टेशनार केल्या, अशें तांणी सांगलें.
सतीश नायक हाणें सांगलें, जात्रे वेळार देवळांत भाविकांची खूब गर्दी जाता. त्या वेळार लोक पुरयतांक साहित्य कुशीक काडून दवरपाक मजत करतात. सोमारा लेगीत सकाळीं देवळांत बायलांनी देवीची व्हट भरपा खातीर खूब गर्दी केल्ली. पूण पुरयत बायलां कडेन चुकीचे पद्दतीन वागिल्ल्यान कांय थळाव्या लोकांनी पुरयतांक जाब विचारले. त्या वेळार विभव गैसास हाणें बायलांक धुकलून उडयले, हाका लागून वादाक सुरवात जाली, अशें तांणी सांगलें.
दोन थळाव्या तरणाट्यां आड मारबडय केल्ल्याची पुरयतान कागाळ केले उपरांत सुमार 100 परस अदीक थळाव्या लोकांनी पुलीस स्टेशनार वचून सिंधुराज गैसास, श्रीदत्त गैसास आनी आदित्य गैसास हांणी रांकेंत उब्यो आशिल्ल्या बायलांक धक्काबुक्की केल्ल्याची कागाळ पुलीस स्टेशनार केली. अदीक म्हायती दितना विशाखा गदंबी हे बायलेन सांगलें, व्हट भरपा वेळार रांकेंत उब्यो आशिल्ल्या बायलांक तीग पुरयतांनी धक्काबुक्की केली. कारण देवळांत जमा जावपी साहित्य कुशीक काडपा खातीर गेल्ल्या लोकां वांगडा पुरयतांनी वाद घातलो. नवदुर्गा देवूळ हें पुरयताचें आनी म्हाजनांचें आशिल्ल्याचेंय तांणी ह्या वेलार सांगले. थळावे लोक तशेंच भावीक देवळाचो उत्सव स्वताच्या खर्चान करतात. ताका लागून देवळांत जमा जाल्लें साहित्य झोमून व्हरपाचो यत्न केलो, असो जो आरोप केला तातूंत कसलेंच तथ्य ना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
