भांगरभूंय | प्रतिनिधी
गुदिन्हो, पालेकार हांचें आवाहन
पणजीः सरकारांतले मंत्री जनतेक लुटतात, एका मंत्र्याक 20 लाख रुपया स्वता दिल्ल्याचें वक्तव्य आदले मंत्री पांडुरंग मडकयकार हांणी केल्ल्यान सरकार आनी भाजपा मदीं बोवाळ जालां. लाच दिल्ल्या संबंदीत मंत्र्याचें नांव सांगचें आनी पुलिशेंत कागाळ करची अशें आवाहन उद्देग मंत्री मावीन गुदिन्हो हांणी केलें. पुलिसांनी पांडुरंग मडकयकार हांची चवकशी करून, लाच दिल्ल्या मंत्र्याचें नांव जाणून घेवचें. तशेंच गुन्यांव नोंद करुन चवकशी करपाची मागणी आम आदमी पक्षान केल्या.
भारतीय जनता पक्षाचे राष्ट्रीय सरचिटणीस बी. एल. संतोष हांणी मंगळारा भाजपाचे पदाधिकारी, मंत्री आनी आमदार हांचे कडेन चर्चा केली. मुख्यमंत्री डॉ. प्रमोद सावंत, पर्यावरण मंत्री आलेक्स सिक्वेरा, भलायकी मंत्री विश्वजीत राणे, उपसभापती जोशुआ डिसोझा, आमदार निलेश काब्राल, आदले मंत्री मडकयकार हांणी संतोष हांची भेट घेवन चर्चा केली. भेट घेतल्या उपरांत मडकयकार हांणी पत्रकारां कडेन उलयतना मंत्री लोकांक लुटतात असो आरोप केलो. एका कामा खातीर 20 लाख रुपया एका मंत्र्याक दिल्ले अशेंय तांणी सांगलें. तांच्या ह्या आरोपाक लागून सरकारा भितर आनी पक्षांत बोवाळ जाला.
हें विशीं प्रदेश अध्यक्ष दामू नायक हांचे कडेन संपर्क सादलो तेन्ना तांणी उलोवपाक न्हयकार दिलो.
आदल्या मंत्र्यांनी भ्रश्टाचार केल्ल्याचो आरोप करप ही गंभीर गजाल. पुलिसांनी मडकयकार हांची चवकशी करून लाच दिवपी मंत्र्याचें नांव जाणून घेवचें. गुन्यांव नोंद करुन प्रकरणाची चवकशी करची अशी मागणी आम आदमी पक्षाचे गोंय मुखेली अॅड. अमित पालेकार हांणी केल्या. पणजेंत पत्रकार परिशद घेवन तांणी ही मागणी केली. तशेंच कागाळ दाखल जावंक नासली तरी पुलिसांक स्वता दखल घेवन गुन्यांव नोंद करपाचो अधिकार आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
