भांगरभूंय | प्रतिनिधी
फाटल्या कांय वर्सांत एफआयआर नोंद करप ही फकांडां जावन पडल्यांत. हें जालें केलें एफआयआर, तें जालें केलें एफआयआर… म्हाका दिसता न्यायालयांत प्रत्यक्ष वचनासतना असले हे प्रस्न बरे पयकीं दुबाबा विरयत घरा कडेन सोडोवपाक जातात.
धर्मीक भावना दुखयिल्ल्या प्रकरणांत काणकोण पुलिसांनी उद्देजक, साहित्यकार दत्ता नायक हांचेर गुन्यांव नोंद केला. दत्ता हांणी अटकपूर्व जामिना खातीर अर्ज केल्लो, तांकां जामीन मेळ्ळो, अशें हालींच वाचलें. ‘धर्माच्या नांवा खाला मठ, देवळां भरपूर पयसो लुट्टात’, अशें वक्तव्य दत्ता नायक हांणी एका चॅनलाक मुलाखत दितना केल्लें. उपरांत समाजीक शांतिकायेचा भंग करून धर्मीक भावना दुखाविल्ल्यान तांचे आड पुलीस स्टेशनांचेर कागाळी नोंद जाल्ल्यो.
म्हजे पुरते सांगचें जाल्यार म्हज्या मनांत (असोच, चड विचार करून न्हय वा अभ्यास करून न्हय.) असलीं खूब प्रकरणां वाचतकूच एक निर्धार पक्को जाला की जांच्यो भावना फट करून दुखावतात त्यो व्यक्ती भिजूड आसतात वा अशें म्हणुया की जे भिजूड आसतात तांच्योच भावना रोखड्योच दुखावतात. भावना दुखावप हें हालींच्या काय वर्सांनी एक अडेची गजालशी दिसपाक लागल्या. काळजान घट्ट आनी निडर आशिल्या मनशाच्यो तथाकथीत भावना केन्नाच दुखावपाची शक्यताय ना. ताका कितें वादग्रस्त दिसल्यार तो तशे उलोवपी मनशांक सटासट करून जापेक जाप दितलो.
हालींच्याच काळांत अशेंच आनीक एक प्रकरण घडिल्लें. एक समाजसेवक सेंट फ्रांसीस शावियेर हांचे विशीं उलयलो. ते बराबर थोडे क्रिस्तांव भाव खुबळ्ळे, तांच्यो भावना दुखावल्यो. दुसरे वटेन, त्या समाजसेवका विशीं विचार करूया. म्हाका तर तो भिजूडच दिसलो. कारण तूं सेंट फ्रांसीस झेवियर हांचे विशीं कितें तरी उलयतो न्हय? मागीर लिपून कित्याक रावलो? तुला जर इतली खात्री आशिल्ली जाल्यार तुवें मुखार रावन हड्ड्यार हात मारून कित्याक उकतेपणान सांगलें ना की हय, हांवें तशें विधान केलां. तूं लिपून रावलो हाचे वयल्यान अशें दिसून आयलें की तुवें हें विधान बेठेंच समाजांत खवदळ घालपा पासत केल्लें.
दत्ताबाबान धर्माच्या नावान मठ, देवळां पयशे लुट्टात अशें म्हणलें तेन्ना लोकांच्यो ‘धार्मीक’ भावना दुखावपाचीं कारणां कितें, म्हाका कांयच अर्थ लागलोना. एक चमत्कार सो! म्हाका अशें निखालस दिसना की दत्तान जेन्ना हें विधान केलें तेन्ना तांच्या मनांत ‘देव’ म्हणपाचें आशिल्लें. म्हज्या हिसपान तांच्या मनांत देवाच्या नावान मठ, देवळांतलीं ‘प्रस्थां’ लुट्टात अशें म्हणपाचें आशिल्लें. मनीस लुट्टात अशें कोणी म्हणल्यार धार्मीक भावना दुखावपाचो प्रस्न खंय येता? विचार करात, देव कित्याक पयशे लुट्टलो? देवाक काय जीम आनी स्विमींग पूल आशिल्लो आठ माळ्यांचो बंगलो बांदपाचो ना. देवाक कांय भांगराची व्होंवळीक थाडून पुताक लग्न करपाचें ना. देव काय विमान विकतें घेवपाचें येवजुचो ना, देवाक काय स्टार हॉटेलांनी जेवपाची वान्सा ना, देवाक पासय म्हूण स्विट्झरलँडाक वचपाचें ना. धर्माच्या नावाचेर लुटपी, चोरी करपी जर कोण मनीस आसा आनी ताका जर ‘चोर’ म्हणल्यार हांगां धर्माचो संबंद येताच कसो?
हांव स्वता देव मानीना. तरीय हांव देवूळ म्हूण जी वास्तू आसा तातूंत पावल दवरता. कारण म्हाका भजन आयकुपाक खूब खोस भोगता… आनी भजन तर देवळांतूच भितर जाता. म्हणटकच, देवळाचे भोंवतणी पासयो मारीत भजन आयकतां. लावडस्पीकर आसताच आनी चड गरजेचें म्हणल्यार देवळाच्या प्राकारांत फाटल्यान गाडी येता काय, हाचो हुस्को करचो पडना. पूण भजन सोंपतकूच आनी आरती जातकूच दोणो घेवपाक म्हाका देवळांत भितर वच्चेंच पडटा. दोण्यांतली पंचकाताय आनी सांजो वा चण्याची उसळ खावपा इतली मजा दुसरी आनीक कसलीच ना. म्हूण हांव केन्नाच दोणो चुकयना. दुसरे म्हणचे, म्हजो घराबो मंगेश देवाचो. तरीय म्हाका मंगेश देवस्थानाचो अध्यक्ष कोण हाची अजून म्हायती ना. आतांचोच कित्याक, हाचे पयलीं पसून कोण अध्यक्ष आशिल्ले हाची वासपूस हांवें करुंक ना. आतां मदींच हांवें म्हज्या संबंदान हें पुराण कित्याक लायलें? कारण म्हाका अशें दाखोवपाचें आसा की देवळांतल्या घडामोडीं विशीं म्हाका कसलीच जाणविकाय ना आनी हांव तातूंत पडनाय बी. हांव देवळांतल्या कारभारा विशीं नेणार आसा. तरीय दत्ताबाबान खुणायल्यात तसले प्रकार देवळां संबंदांत वारंवार घडटात, अशें हांवें म्हज्या इश्टां कडच्यान आनी सांगात्यां कडच्यान खूब आयकलां… आनी म्हजे हे इश्ट आनी सांगाती सादे हिंदू न्हय, तर ते कडवे हिंदू.
फाटल्या कांय वर्सांत एफआयआर नोंद करप ही फकांडां जावन पडल्यांत. हें जालें केलें एफआयआर, तें जालें केलें एफआयआर… म्हाका दिसता न्यायालयांत प्रत्यक्ष वचनासतना असले हे प्रस्न बरे पयकीं दुबाबा विरयत घरा कडेन सोडोवपाक जातात. म्हणजें कितें करप? देवळांतल्या अध्यक्षांनी वचून दत्ताबाबाची वा वादग्रस्त उलोवप्याची भेट घेवप. तांणी ताका स्पश्टपणान कांयच चुकय लिपय नासतना, सगलें सविस्तरपणान, उक्तेपणान समजावन सांगप. तांणी सांगप की ‘आमी ह्या- ह्या देवळांचे अध्यक्ष. आमी निवळ मनान देवाची सेवा करपाक म्हूण वेंचणूक लडोवन देवस्थानचे अध्यक्ष जाल्यात. आमकां देवळांत लोक घालतात वा दान करतात ते पयशे लुटपाची बी इल्लीय वान्सा ना आनी आमी लुटनातूय बी. तरीय लोकांच्या मनांत आमचे विशीं दुबाब उप्रासतात की आमी देवाचो पयसो लुट्टात. घडये आमच्यो कांय करण्यो अशो धांदलीच्यो आसत की आमी जरीय पयसो लुटनात तरीय आमचे करणेन आमी पयसो लुट्टात अशी लोकां मदीं समजणी जाता. तुमची जाल्या तशीच. तेन्ना आमी लुट्टात अशें तुमी खंयचे गजाली वयल्यान तर्क केलो ती वा त्यो गजाली आमकां मेकळेपणान समजावन सांगात. म्हणचे आमकां आमचे करणेंत बदल करपाक वाव मेळटलो वा तुमची कितें गैर समजणी जाल्या आसत तर तुमचो दुबाव पयस करपाक आमकांय बी तितलीच संद मेळटली.’ हें हिंदींत म्हणटात तशें, ‘दुध का दुध और पानी का पानी’ तशें कितें तरी जावन वचुंदी.
लेख सोंपयतना म्हज्या मनात एक गहन प्रस्न उबो रावता. मठांतलीं, देवळांतली कांय प्रस्थां समजा पयसो लुट्टात जाल्यार आमी मठ, देवळां पयसो लुट्टात, अशें कित्याक म्हण्टात? भाशेचो बी कितें घोळ !!
अरविंद काकोडकार
जी- 4, यश, बीडी उपजिल्हो हाॅस्पिटल
चिखली
फोन- 2540097
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
