भांगरभूंय | प्रतिनिधी
भांगरभूंय । खबरां मेज
पणजीः केंद्रीय लोकसेवा आयोगाचे यूपीएससी परिक्षेंत देशांत 502वी सुवात मेळोवन पास जाल्ले खातीर मठग्रामस्थ हिंदू सभेच्या श्री दामोदर उच्च माध्यमीक विद्यालयाची आदली विद्यार्थिनी सोमय्या कुमारी हिका मठग्रामस्थ हिंदू सभेचे अध्यक्ष भाई नायक, शिक्षक आनी पत्रकार अनिल पै आनी विद्यालयाचे प्राचार्च राजीव देसाय हांणी ताच्या वेरोडें- कुंकळ्ळी हांगच्या घऱा वचून परबीं भेटयलीं.
यूपीएससी सारके कठीण परिक्षे खातीर खूब तयारी करची पडटा. खर निश्चेवान यत्न करचे पडटात. सोमय्यान ते करून दाखयले. जिणेंत व्हडलें ध्येय आनी सपना पळोवपी होतकरू विद्यार्थ्यां खातीर तें आतां एक आदर्श थरलां अश्या उतरांनी भाई नायकान ताचो भोवमान केलो.
मठग्रामस्थे सभेच्या आदल्या विद्यार्थिनीन जें येश मेळयलां तें सभे खातीर अभिमानाचो खीण आसा अशें अनिल पै हाणे सांगलें. आपले शिक्षणीक कारकिर्दीचे सुरवेक प्रेरक शक्ती थारिल्ल्या दामोदर उच्च माध्यमीक विद्यालयाचे प्राचार्च, शिक्षक आनी कर्मचारी हांच्या उपकारांत हांव सदांच आसतलें अशें सोमय्या कुमारीन आपली कृतज्ञना उक्तायना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
