भांगरभूंय | प्रतिनिधी
हैदराबाद, खबरां संस्था ः क्षुल्लक कारणाक लागून लग्न मोडपाची प्रकरणां जायतीं आसात. आइसक्रीम, पनीर वा गुलाब जामुना वयल्यान झगडीं जाल्ल्यान लग्न मोडपाच्यो घडणुकोय घडल्यात. तेलंगणात असोच एक प्रकार घडला. पूण हें लग्न मटणा वयल्यान मोडलें. मटणाक लागून न्हवरेकारांनी झगडीं केली आनी तीं इतलीं वाडलीं की लग्नच मोडून न्हवरो आपल्या घरा गेलो.
तेलंगणाच्या निजामाबादांत रावपी एके चलयेचे लग्न जगतियाल जिल्ह्यांत रावपी तरणाट्या कडेन थारलें. ह्या लग्नांत व्हंकले वटेनच्यान मांसाहारी जेवणाची वेवस्था केल्ली. न्हवरो व्हंकलेच्या घरा लागीं उबारिल्ल्या मांटवांत आयलो. सुरवेक सगळें सारकें चलतालें. लग्नांत मांसाहारी जेवण आशिल्ल्यान न्हवरो, धेडो, ताचे इश्ट उमेदी आशिल्ले आनी तांणी जेवपाक सुरवात केली. मजगतीं, जेवणांत मटण नळी (Bone) मेळूंक नाशिल्ल्यान एकेकल्यान कागाळ करपाक सुरवात केली.
जेवणांत मटणाची एक पसून नळी मेळना अशी कागाळ न्हवरेकारांनी केली. दोनूय वटेनच्या लोका मदीं झगडी जाली. झगडीं इतली वाडली की दोनूय वटांनी लोक सरळ पुलीस स्टेशनार गेले. न्हवरेकारांनी कागाळ केली की “व्हंकलकारांनी न्हवऱ्याक ताच्या जेवणांत मटनाची नळी दिवंक नाशिल्ल्यान आमचो अपमान जाला”.
व्हंकलकारांनी म्हणलें, जेवणांत मटण आसलें तरी तातूंत नळयो आसच्यो नात अशें आमी पयलींच सांगिल्लें. निमाणें कांय लोकांनी दोनूय वटांच्यो लोकांक समजावपाचो यत्न केलो. पूण, तातूंत कोणाकूच येस मेळ्ळें ना आनी निमाणें मटणाक लागून हें लग्न मोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
