भांगरभूंय | प्रतिनिधी
गुन्यांव फांट्यान मटको एजंटाचेर केल्ली कारवाय
पणजी: गोंय पुलिसांच्या गुन्यांव फांट्यान 1 मे दिसा राज्यांत मटको जुगार प्रकरणांत मोटी कारवाय केल्ली. ह्या प्रकरणांत गुन्यांव फांट्यान कल्याण मटको किंग सर्गेस्त सुरेश भगताची घरकान्न जया चड्डा (मुंबय) आनी गुजरातचो चंदुभाई ठक्कर उर्फ डिसा आनी घनश्याम भाई हांचे सयत 12 थळाव्या मटको एजंटांक नोटीस जारी करून चवकशेक हजर रावपाक सांगलां.
गुन्यांव फांट्याच्या पंगडान 1 मे दिसा पणजे, म्हापशें, पर्वरी, मडगांव, वास्को, फोंडें, मांद्रें, पेडणें आनी हेर वाठारांनी मेळून 12 सुवातांनी मटको, जुगाराचेर धाड घाल्ली. ह्या प्रकरणांत गुन्यांव फांट्यान रामचंद्र बिंद (50, वास्को), बलप्पा तलवार (55, फातोड्डें), अली शेख (28, रेईश मागूश), करमराज कुमार (25, हरमल), प्रकाश ताकेकाट (46, माशेल), गंगप्पा लमाणी (40, मडगांव), जेरीमीयास नायक (41, बेतीं), धनंजय वराडे, (69, म्हापशें), परशुराम मदार, (26, बार्दोडें), अनिलकुमार सूर्यवंशी (37, काणका – बार्देस), आरीफ मुलुगुंड (32, बेती) आनी नवनाथ काशेलकार (51, पेडणें) ह्या 12 बुकींक ताब्यांत घेवन अटक करून जामिनार सुटका केली.
गुन्यांव फांट्यान वयल्या अटक केल्ल्या 12 बुकीं सयत अण्णा, परेश, सुभाष, निलेश, मौसीन, गुलजार, अप्पू तिवारी, नारायण परब, सोमनाथ, भारत तोरसकार, रमेश आनी अमरेश ह्या 12 थळाव्या एजंटां बरोबर कल्याण मटकाे किंग स. सुरेश भगताची घरकान्न जया चड्डा (मुंबय) आनी गुजरातचो चंदुभाई ठक्कर उर्फ डिसा आनी धनश्याम भाई ह्या मुखेल एजंटाक मेळून 27 जाणां आड गोंय दमण आनी दीव भौशीक जुगार प्रतिबंधक कायद्या खाला गुन्यांव दाखल करून तपास सुरू केला.
मजगतीं, गुन्यांव फांट्यान 12 थळाव्या एजंटां बरोबर कल्याण मटको किंग स. सुरेश भगताची घरकान्न जया चड्डा (मुंबय) आनी गुजरातचो चंदुभाई ठक्कर उर्फ डिसा आनी धनश्याम भाई ह्या मुखेल एजंटाक नोटीस दिवन चवकशेक हजर रावपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
