मजती परस नोकरी बरी

भांगरभूंय | प्रतिनिधी

गोंयकार तशे खावन- जेवन सुखी आसात, पूण अशीय कुटुंबां आसात, जांकां येणावळीचो स्रोत ना. अश्या घराब्यांक अर्थीक मजत करपाक सरकाराच्यो साबार येवजण्यो आसात.

अायच्या काळांत मरण केन्ना येत हें कोणूच सांगपाक शकनात. आमच्या गोंयांत तर वर्साक तिनशे वयर लोक अपघात जावन मरतात. जिणेशैली इबाडिल्ल्यान साबार दुयेंसां, रोग जावंक लागल्यात. खंयूय, केन्नाय, कितेंय, कितलेंय, कशेंय खावपाक धरबंद उरूंक नात. मध्यानरातीं तेलकट, मसाल्याचें खावपी लोक आसात. सद्दां रातचे दोन, अडेजांक (रातपाळी करपी न्हय) न्हिदपी आसात. भलायके कडेन आडनदर जातकच मरण बेगीन येता. सोरो, ड्रग्साचें वेसनूय वाडलां…. परिणाम!! पिरायेची पन्नाशी हुपचे पयलीं बरेच जाण हो संवसार सोडून वतात. वेसनाक लागून 35- 40 वर्सांचेर गेल्ले हजारांनी गोंयकार आसात. हाचो परिणाम तांच्या कुटुंबाचेर जाता. ते जोडकार आसल्यार कुटुंब भिकेक लागपाचो वेळ येता. गोंयकार तशे खावन- पिवन सुखी, पूण अशींय कांय कुटुंबां आसात, जांकां येणावळीचो स्रोत ना. तांचे मजती खातीर सरकाराच्यो साबार येवजण्यो आसात. दयानंद समाजीक सुरक्षा येवजण (डीएसएसवाय) ही तातूंतलीच एक. तिचे वरवीं विधवांक दर म्हयन्याक अर्थीक मजत मेळटा. तातूंत आतां थोडो बदल जाला.
गोंयांत विधवां खातीर सरकारी येवजण्यो आसात. आतां डीएसएसवाय खाला जिचें सगल्यांत ल्हान भुरगें 21 वर्सां पिराये खाला आसा, ते विधवेक अडेज हजारां बदला दर म्हयन्याक 4 हजार रुपया मेळटले. समाज कल्याण खात्यान तशी अधिसुचोवणी काडल्या. सगल्या विधवांक हे येवजणे खाला दर म्हयन्याक अडेज हजार रुपया मेळटात. जांकां भुरगीं नात, जांचें सगल्यांत ल्हान भुरगें 21 वर्सां परस व्हडलें आसा तांकां, तशेंच साठ वर्सां वयले विधवेक अडेज हजारुच मेळटले. फक्त ल्हान भुरगीं आशिल्ल्याची मजत देड हजार रुपया वाडयल्या. जांकां हे येवजणे खाला दुडू मेळटात, तांकां गृहआधार येवजणेचो लाव मेळचो ना. चडांत चड 1 लाख 40 हजार विधवांक ही मजत मेळटली. बाकीच्यांक प्रतिक्षा वळेरेंत दवरतले. पयली येवपी विधवेक पयलें प्राधान्य, अशेंय अधिसुचोवणेंत म्हणलां.
एकान एक सरकारी येवजणेचो फायदो फक्त आनी फक्त गरजू मनशाकूच जावंक जाय. थोडे हाका- ताका घट धरून गैरफायदो घेतात. वेंचणुकांच्या दिसांनी तर येवजण्यो, सवलतीचे फाॅर्म खिरापत वाटिल्ले भशेन वांटप जाता. उमेदवाराचे लागींचे वावुरपी घरा येवन ते भरतात, सरकारी कचेऱ्यांनी स्वता व्हरून दितात. कोणाक खंयच्यो येवजण्यो मेळटात, तांच्या नांवांचीं वळेरी खरें म्हणल्यार पंचायतीन ग्रामसभेंत लोकांक वांटपाक जाय. सरकारी यंत्रणांनीय ह्यो येवजण्यो कोणाक मेळटात, ताची प्रत्यक्ष पळोवणी करुंक जाय. ते खातीर स्वराज्य संस्थांची मजत घेवं येता. हें करीत जाल्यार धपको दिवपी सत्य मुखार येतलें!! गोंयांत म्हारगाय खूब, सगल्यांकूच पयशांची गरज आसा, ही गजाल खरी, पूण साडेसात लाखांची मोटार घेवन बीपीएल रेशनकार्डाचेर रेशन व्हरपाक कांय गरीब (?) लोक येतात आनी मागीर चड पयशे घेवन तें भायल्यांक विकतात तशें जावंक फावना. बीपीएल रेशनकार्डांचेर फुकट धान्य गाडयेकार, नोकरदार गरिबांक आडावपाक सरकारान फाटीं तकली लडयली, तशेंच हेर अर्थीक येवजण्यांचे बाबतींत केन्ना जातलें? सरकारी पयसो हो निमणो लोकांचो पयसो. तो ज्या उद्देशान वापरतात, तो सफल जावंक जाय.
गोंयांतल्यो चडशो बायलो सुशिक्षीत. नोकरी करपीय हजारांनी आसात. थोड्यो सरकारी नोकरी करतात. डीएसएसवाय खाला सरकार अर्थीक मजत करतात, त्यो बायलो कसली नोकरी करतात, तांकां पगार कितलो, घरची अर्थीक परिस्थिती कशी आसा, ताचोय अभ्यास जाल्यार बरो. तांचीं भुरगीं नोकरी, वेवसाय करतात काय नात, ताचीय चवकशी करूंक जाय. तशें आसल्यार मागीर ते विधवेक फावता जाल्यार गृहआधार येवजण दिवं येता. सरकारी नोकरी करपी घोव मरतकच ताचे बायलेक वा एका भुरग्याक ती वा हेर कसलीय सरकारी नोकरी दितात. त्याच तत्वाचेर, बेरोजगार विधवेक तिच्या शिक्षणा प्रमाण सरकारी नोकरी दिवंक जाय. निदान सरकारी अनुदान घेवपी विवीध संस्थांनी तिका बऱ्या पगाराचे नोकरेंत आस्पावपाची तजवीज आसूंक जाय. भत्ते, अनुदानां, सवलती परस प्रत्यक्ष नोकरी दिवप केन्नाय बरें. ती वेवसाय, कारागिरी, लघुउद्देग, लोणचें- पापडा सारको घरगुती उद्देग…. करपाक सोदता जाल्यार सगले तरेची सरकारी मजत, बाजारपेठ मेळोवन दिवं येता. सरकारी यंत्रणांक हें सहज शक्य आसा. हातूंतलें कांयच करप कशेंच शक्य ना. जाल्यार डीएसएसवाय खाला मेळटा ती अर्थीक मजत वाडोवची. गरीब, गरजू, जिचो येणावळीचो कसलोच स्रोत ना, तिका म्हयन्याक 10 हजार रुपया तरी दिवचे.