भांगरभूंय | प्रतिनिधी
भांगरभूंय । प्रतिनिधी
पोरणे गोंयः रिव्होल्युशनरी गोवन्स पक्ष म्हणल्यार गोंयच्या समाजाक लागिल्लें एक खत ह्या मगो पक्षाचो फुडारी आनी वीज मंत्री सुदिन ढवळीकार हाच्या निवेदनाक आरजीपीच्या फुडाऱ्यांनी खर आक्षेप घेवन महाराष्ट्रवाद गोमंतक (मगो) पक्षाक गोयांतल्या सोपोवपाचो निर्धार केला. सोमाराक पणजे पत्रकारां कडेन उलयतना पक्षाचो आमदार विरेश बोरकार, पक्षाचो अध्यक्ष मनोज परब हांणी मगोक सोपोवपाचो सोपूत आमी घेतला अशें सांगलें.
मडकय मतदारसंघांत बांदोडें हांगा आयोजीत केल्ले पंचायत चलो अभियान कार्यावळींत आरजीचो सरचिटणीस विश्वेश नायक आनी सुदिन ढवळीकारा मदीं वादावादी जावंन ढवळीकार हाणे नायक हाचो गळो अंदीतलों अशें म्हणिल्ले. उपरांत एके मुलाखतींत ताणे रिव्होल्युशनरी गोवन्स म्हणल्यार गोंयच्या समाजाक लागिल्लें खत अशें सांगिल्लें. आमी ह्या विधानाचो खर निशेध करतात. गोंयांत सद्या महाराष्ट्रवादी गोमंतक पक्षाचें जें थोडें अस्तित्व आसा तें आमी ना नपयत करतले अशें मनोज परबान सांगलें.
पक्षाचो सान्तआंद्रेचो आमदार विरेश बोरकार हाणेय सुदिन ढवळीकाराच्या विधानाचो निशेध केला. रिव्होल्युशनरी गोवन्स पक्षान मडकय मतदारसंघांत जो वावर चलयलां ताका लागून सुदिन ढवळीकार सामको थतरवितर जाला आनी त्या वैफल्यांतल्यान ताणे आमचो फुडारी विश्वेश नायक हाचो गळो अंदूवपाची धमकी दिवपी दिल्या. मगो पक्ष सत्तेंत वांटेकार आशिल्ल्या भाजपा सरकाराक आरजीच्या तरणाट्यांची सामकी भिरांत दिसपाक लागल्याय तातूंतल्यान हे प्रकार घडपाक लागल्यात अशें बोरकारान सांगलें.
सुदिन ढवळीकार आपल्या वैयक्तीक सुवार्था खातीर आमकां इतलीं वर्सा वापरत आयला हे मडकय मतदारसंघातल्या लोकांक आनी कळून आयलां. आपल्या मतदारसंघांत आरजीचो प्रभाव वाडपाक लागला देखून तो काजाबूल जाला अशेंय ताणे सांगलें. विश्वेश नायक हाणे बांदोड्याचे कार्यावळीत किदें जालें तें पत्रकारांक सांगलें. मंत्री जर लोकांच्या प्रस्नांक जाप दिवपाक शकना जाल्यार तांणी पंचायत चलो कार्यावळ आपल्या घरांत स्वताच्या खर्चान आयोजीत करपाक जाय अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
