भांगरभूंय | प्रतिनिधी
भाजप, काँग्रेसी मदीं आसा सेटींंग: आप
पणजी: फोंडें पोटवेंचणुकेंत मगोचे कांय नगरसेवक आनी कार्यकर्ते काँग्रेस उमेदवाराचो प्रचार करतात. हे विशींचे पुरावे आमचे कडेन आसात. फोंंडें पोटवेंचणुकेंत काँग्रेस आनी भाजप ह्या पक्षां मदीं सेटींग आसा, असो आरोप आम आदमी पक्षाचे प्रदेश अध्यक्ष वाल्मिकी नायक हांंणी केलो. ह्या वेळार पक्षाचे उपाध्यक्ष संंदेश तेळेकर देसाय हाजीर आशिल्ले.
फोंडें पोटवेंचणुकेचे फांटभुंयेर आम आदमी पक्षान फोंड्यां पत्रकार परिशद घेतली. प्रचार करतनाचे फोटे लेगीत ह्या वेळार तांणी दाखयले.
फोंडें पोटवेंचणुकेंत भाजप आनी मगो पक्षा मदीं युती आसा. मगो हो सरकाराचो घटक आशिल्ल्यान ही युती आसा. नंंदनवन फोंड्यां मगोची सभा जाली. हे सभेंत भाजप उमेदवार रितेश नायक हांंकां जाहीरपणान तेंको दिलो. हे सभेक जे लोक हाजीर आशिल्ले तातूंतले कांय जाण काँग्रेस उमेदवार डॉ. केतन भाटीकार हांंचो प्रचार करताले. हे विशीं पुरावे लेगीत आसात, अशें वाल्मिकी नायक हांंणी सांंगलें.
फोंडेंची पोटवेंचणूक 9 एप्रीलाक जातली. हे पोटवेंचणुके खातीर उमेदवार जाहीर जावचे पयलीं सावन सगले जाण प्रचार करतात. डॉ. केतन भाटीकार हांंकां काँग्रेसीन उमेदवारी दिल्या. मगाेचे बरेच कार्यकर्ते तांचे खातीर प्रचार करतात, अशी म्हायती नायक हांंणी दिली.
हाचे पयलीं काँग्रेसीच्या उमेदवारीचेर वेंचून आयले उपरांंत खूबशा आमदारांनी भाजपांत प्रवेश केला. डॉ. केतन भाटीकार हे वेंचून आयले जाल्यार भाजपांत प्रवेश करपाची शक्यताय न्हयकारूंक येना. भाजप आनी काँग्रेसी मदीं सेटींंग आसा, अशें उपाध्यक्ष संंदेश तेळेकार देसाय हांणी म्हणलें.
भाजप आनी काँग्रेसी मदी सेटींग आसतना फोंडेंच्या मतदारा मुखार आप हो एकूच पर्याय आसा, अशें तांंणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
