भांगरभूंय | प्रतिनिधी
युती घटमूट आशिल्ल्याची दोनूय पक्षांच्या अध्यक्षांची म्हायती
भांगरभूंय । प्रतिनिधी
पणजी : मुख्यमंत्री डॉ. प्रमोद सावंत हांणी राज्यपाल पी. एस. श्रीधरन पिल्लई हांची भेट घेवपाच्या कांय खिणां उपरांत मगोचे अध्यक्ष दीपक ढवळीकार हांणी प्रदेश भाजप अध्यक्ष दामू नायक हांची भेट घेतली. मगो आनी भाजप युती घटमूट आसा. वेंचणुकेक दोन वर्सां आशिल्ल्यान सध्या तरी जागा वांटपाचो विशय ना. वेंचणुके वेळार जागा वांटपाचेर चर्चा जातली, अशें दोनूय पक्षाच्या अध्यक्षांनी सांगलें.
मगोचे अध्यक्ष दीपक ढवळीकार हांणी भाजप कार्यालयांत बिरेस्तारा पयलेच खेपे प्रदेश भाजप अध्यक्षांची भेट घेवन चर्चा केली. मंत्रीमंडळ फेरबदल चर्चेचे फाटभुंयेर ही भेट जाल्ल्यान भेटीक म्हत्व आयलां. बसकेंत राजकी स्थितीचेर चर्चा जाल्याचें दामू नायक हांणी सांगलें.
मगो आनी भाजप हे समविचारी पक्ष आशिल्ल्यान आमची युती आसा. सर्गेस्त मनोहर पर्रीकार आसतना 2012 ते 2017 मेरेन आमची युती आशिल्ली. आतांय युती आसा. विधानसभा वेंचणुकेक आनीक दोन वर्सां आशिल्यान जागा वांटपाचो सध्या तरी विशय ना. वेंचणुके वेळार हाचेर चर्चा जातली. अध्यक्ष जाले उपरांत पयलेच खेपे आपूण दामू नायक हांची भेट घेतली, अशें मगोचे अध्यक्ष दीपक ढवळीकार हांणी भेट जाले उपरांत सांगलें.
भेटींत राजकी स्थितीचेर चर्चा जाली. मगो वांगडा आमची युती घटमुट आसा. विधानसभा वेंचणुकेक बरोच तेंप आशिल्ल्यान जागा वांटपाचो सध्या तरी विशय ना. भारतीय जनता पक्ष हो स्वतंत्र पक्ष आशिल्ल्यान दरेका मतदारसंघांत आमचो वावर चालूच उरतलो. ह्या वावराचो युती कडेन संबंद ना, अशें प्रदेश अध्यक्ष दामू नायक हांणी सांगलें. दिल्लींत भाजपाचे राष्ट्रीय सरचिटणीस बी. एल. संतोष हांची भेट घेतले उपरांत मगोचे अध्यक्ष दीपक ढवळीकार हांणी बिरेस्तारा प्रदेश भाजप अध्यक्ष दामू नायक हांची भेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
