भांगरभूंय | प्रतिनिधी
बद्रीनाथ, खबरां संस्था : फुडल्या सोमारा अयोध्येक रामलल्लाची (बाल राम) प्रतिश्ठापना जाता. मात, हे कार्यावळीचेर हिंदू धर्मांतल्या शंकराचार्यांनी बहिश्कार घाला. ताचेर सोशल मिडियाचेर शेंकड्यांनी प्रतिक्रिया येत आसात. कांय जाणांनी खुद्द शंकराचार्यांचेरुय खर टिका केल्या. आतां हे विशीं बद्रीनाथ पीठाचे शंकराचार्य स्वामी अविमुक्तेश्वरानंद सरस्वती हांणी आपलें मत मांडलें. म्हाका राम मंदिर लोकार्पणाचें निमंत्रण मेळूंक ना. तें मेळ्ळ्यारुय हांव वच्चो ना, अशें तांणी म्हणलां. हाचे वयल्यान परत वाद जावं शकता.
हेर तीन पिठांक आमंत्रण मेळ्ळां काय ना, तें म्हाका खबर ना. तें मेळचें अशी अपेक्षाय आमी करीनात. शंकराचार्यां सामकार शास्त्रांचे नेम डावलून जर कितें जाता, जाल्यार आमी तें सोंसपाक शकनात. जें धर्मकार्य करपाचें आसा, तें शास्त्रांच्या नेमा प्रमाणूच जावपाक जाय, अशें तांणी सांगलें.
देवूळ हें देवाचें रुप
देवळू म्हणल्यार देवाचें रुप. ताचें आंग म्हणल्यार देवूळ आनी मूर्ती म्हणल्यार आत्मो. कळस ही देवाची तकली. पायां पसून कळसा मेरेन देवाच्या आंगाची प्रतिश्ठापना करतात. मुखामळ, देवाचे दोळे, मुकूट कांयच तयार जावंक ना. फक्त सकयलें धड तयार आसा, ताची प्राणप्रतिश्ठा करप चुकीचें. ती चूकय सामान्य चूक न्हय, अशें अविमुक्तेश्वरानंद सरस्वती हांणी सांगलें.
गाभारो तयार आसा, ताका लागून प्राणप्रतिश्ठा जावपाक शकता, असो प्रस्न केलो तेन्ना शंकराचार्यान सांगलें, देवळाचो गाभारो हो आवयच्या गर्भा प्रमाण आसता. तो तयार जालो म्हणजे गर्भाशय तयार जालें. तातूंतलो देव कसो मुखार येतलो. ताका णव म्हयने लागतात. ते उपरांत देवाचें दर्शन जाता. हांगा पुराय आंगूच तयार जावंक ना. देवळाक आंगाचें रुप धर्मांनूच दिलां, तें रुप नासतना प्राणप्रतिश्ठा कशी जातली, असो प्रस्न तांणी केलो.
22 जानेवारीक म्हुर्त ना
80 टक्के हिंदू म्हुर्त मानतात. ताका लागून पंचांग पळोवपाची पद्दत अजून आसा. कसलोय संस्कार करपाचो जाल्यार पंचांग पळयतात. खंयच्याय एका पंचांगांत 22 जानेवारी प्राणप्रतिश्ठापने खातीर शुभ आसा जाल्यार म्हाका दाखययात. देशांतले बरेच ज्योतिशी पंचांग छापतात. एकल्यानूय हो दीस प्राणप्रतिश्ठे खातीर शुभ अशें दिवंक ना. तो जर बरो म्हूर्त जाल्यार ताचो उल्लेख पंचांगांत कित्याक ना? हांवें स्वता 15 पंचांगां हाडून पळयलीं. तातूंत 22 जानेवारीक प्राणप्रतिश्ठेचो म्हूर्त ना. जांणी म्हूर्त आसा, अशें म्हणलां तांकां जानेवारींतलो म्हूर्त काडपाचो आदेश दिल्लो. जांकां जो बरो दिसलो तो म्हूर्त तांणी दिलो. हातूंत ज्योतिशांची कांय चूक ना, अशें अविमुक्तेश्वरानंद सरस्वती हांणी सांगलें.
आमंत्रण मेळिल्लें जाल्यार आमी अयोध्येक वचपाचे, पूण प्राणप्रतिश्ठा सुवाळ्यांत वांटेकार जावचे नासले. कारण आमंत्रण हें देवा कडल्यान येता, अशी आमची श्रद्धा. आमी दोळ्यां मुखार अधर्म घडटना पळोवपाक शकनात, अशी टिकाय सरस्वती हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
