मंदार, अस्मिता बुद्दीबळ सर्तींत वस्ताद

भांगरभूंय | प्रतिनिधी

राज्य पांवड्या वयले 19 वर्सां पिराये सकयले ज्युनियर बुद्दीबळ सर्तींत मंदार लाड हाणें उक्त्या गटांत, जाल्यार अस्मिता रे हिणें चलयांच्या गटांत वस्तादपण जोडलें.

बार्देस तालुको बुद्दीबळ संघटनेन गोंय बुद्दीबळ संघटनेचे मान्यतायेन घेतिल्ली सर्त धारगळच्या शांतादुर्गा देवस्थान सभाघरांत जाली.

उक्त्या गटांत मंदार लाड आनी देवेश नायक हांचें समान गूण जाले. टायब्रेकरांत गुणांत मंदार पयलो आयलो. जाल्यार देवेशाक दुसरे सुवातेर समाधान मानचें पडलें. आयुष शिरोडकार साडेपांच गुणां सयत तिसरे सुवातेर आयलो. अनिकेत एक्का, जी. माधवन, नवल सावंत, मयुरेश देसाय, चैतन्य गांवकार, सरस पोवार, विपुल कदम हांकां वळेरेन चवथी ती धावी सुवात फावो जाली.

पिराय गटांत श्रीनिक सिनारी, आर्यव्रत नायक देसाय, विहान तारी, एथन सिल्वेरा, वर्धन मळीक, सिम्प्लिसियो व्हिएगस, वरद नागवेंकार, आयुष नायक, साहिल नायक, एकांग मालवणकार, अवनीश चोडणकार आनी धीरज देसाय हांकां इनामां फावो जालीं.

चलयांच्या गटांत पयली सुवात मेळोवपी अस्मिता रे हिचे पांच गूण जाले. वालंका फर्नांडीस हिका चार गुणां सयत उप वस्तादपण फावो जालें. जाल्यार वैष्णवी परब, लिया सिल्वेरा, सय्यद मैझा, आर्या दुबळे, नव्या नार्वेंकार, कनक प्रभू मोये, तनिशा नायक देसाय, श्रमा मोरुडकार हांका वळेरेन तिसरी ती 10वी सुवात फावो जाली. पिराय गटांत कृत्तिका अग्रवाल, इश्वरी राऊत, विधी नायक, वृषा मणेरकार, सिद्धी नायक, संगीता तळर्णकार, सानिया मयेंकार हांकां इनामां फावो जालीं.

गोंय बुद्दीबळ संघटनेचे सचीव आशेष केणी, भांडारी विश्वास पिळर्णकार, सर्तीचे मुखेल आर्बिटर अरविंद म्हामल, शिरीष दिवकर, प्रभाकर शेटये, डॉ. सुशांत धुळापकार, सत्यवान हरमलकार हे उपस्थीत आशिल्ले.