भांगरभूंय | प्रतिनिधी
मुख्यमंत्री : मागण्यांचेर आपले कडेन चर्चा करपाचो उलो
भांगरभूंय । प्रतिनिधी
पणजी : मंत्र्याच्या घराचेर मोर्चा व्हरपाची आंदोलकांची कृती अयोग्य आसा. आमदार विरेश बोरकर तशेंच हेर विरोधी आमदारांक मोर्चो व्हरप सोबना. कायदो हातांत घे नासतना योग्य मार्गान आंदोलन करचें वा मागण्यांचेर म्हजे कडेन चर्चा करची, असो उलो मुख्यमंत्री डॉ. प्रमोद सावंत हांणी मारला. कलम 39 ए विशीं मात तांणी कसलेंच भाश्य करूंक ना.
नगर नियोजन कायद्याचें कलम 39 ए रद्द करपाचे मागणेच्या आंदोलनान सोमारा वेगळेंच मोडण घेतलें. सांजे आझाद मैदानाचेर 39 ए विरोधांत व्हड सभा जावपाची आसली. मात आंदोलकांनी नगर नियोजन मंत्री विश्वजीत राणे हांच्या बंगल्याचेर मोर्चो व्हरपाचो निर्णय घेतलो. आमदार विरेश बोरकार, काँग्रेस विधीमंडळ फुडारी युरी आलेमांव हांचे सयत आंदोलकांनी नगर नियोजन मंत्री विश्वजीत राणे हांच्या दोना पावल बंगल्या मुखार धरणें धरलें.
आंदोलकांचे हे कृतीक मुख्यमंत्री डॉ. प्रमोद सावंत हांणी खर हरकत घेतली. योग्य मार्गान आंदोलन करपाचो उलो तांणी रातीं बंगल्यार घेतिल्ले पत्रकार परिशदेंत मारलो.
लोकशायेंत आंदोलन करपाचो दर एकल्याक अधिकार आसा. आंदोलन करपाक कोणाचीच हरकत ना. मात तें योग्य मार्गान जावपाक जाय. आंदोलन आझाद मैदानाचेर सुरू आशिल्लें. आझाद मैदानाचेर सभा जावपाची आशिल्ली. अशें आसून मंत्र्याच्या बंगल्याचेर मोर्चो कसो व्हेलो? हाचे पयलीं मोर्चो विधानभवनाचेर हाडल्यात. मुख्यमंत्र्यांच्या बंगल्याचेर मोर्चो हाडिल्लो आसा. मात मंत्र्याच्या खासगी बंगल्याचेर मोर्चो व्हरपाची ही पयलीच खेप आसा. खासगी बंगल्याचेर मंत्र्याचें कुटुंब रावता. हातूंतल्यान जीविताक धोको निर्माण जावपाची शक्यताय आसता. आंदोलकांनी अशे तरेन कायदो हातात घेवप अयोग्य आसा. पुलिसांनी संयम बाळगिला म्हूण स्थिती नियंत्रणा खाला आसा, अशें मुख्यमंत्र्यांनी सांगलें.
अघटीत घडल्यार आंदोलनाचे फुडारी जापसालदार
आंदोलकाक योग्य समज दिवपाची जापसालदारी आंदोलनाचें फुडारपण करपी फुडाऱ्यांची आसा. कायदो सुवेवस्थेचो प्रस्न निर्माण जालो जाल्यार ताका आंदोलनाचे फुडारी जापसालदार आसतले. आमदार विरेश बोरकर हांणी म्हजे कडेन येवन चर्चा करची. आंदोलकांनी निवेदन दिवचें. निवेदनाचेर कार्यवाही जाली ना, जाल्यार योग्य मार्गान आंदोलन करचें. एकाद्या सरकारी कार्यालया भायर रातभर बसून आंदोलन करप हें लेगीत अयोग्य आसा. कर्मचारी वा हेर लोकांक आडखळ जावपाक जायना, म्हूण पुलिसांनी शेनवारा आंदोलकांक भायर काडले, अशें सांगून मुख्यमंत्र्यांनी आंदोलकांक नगर नियोजन खात्याच्या कार्यालया भायर काडपाचे घडणुकेक तेंको दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
