भांगरभूंय | प्रतिनिधी
-सगल्या मंत्र्यां कडेन चर्चा करतले अशेंय केले स्पश्टपणजीः मंत्र्यांनी हेर मंत्र्यांच्या खात्यां विशीं उलोवप सामकें चुकीचें. भाजपाचे प्रदेश अध्यक्ष सदानंद शेट तानावडे हांणी बुधवारा पत्रकारां कडेन उलयतना स्पश्ट केलें. हे विशीं सगल्या मंत्र्यां कडेन चर्चा करतले.
राज्यांतल्या रस्त्यांचो दर्जो उणो आशिल्ल्यान येरादारी मंत्री माॅवीन गुदिन्हो हांणी मंगळारा भौशीक बांदकाम खात्याच्या अभियंत्यांचेर टिका केली. रस्त्याच्या फोंडकुलांक लागून मरण येवप हें माफ करपा सारकें ना. ही जापसालदारकी पीडब्ल्यूडीच्या अभियंत्यांचेर आसता. दर खेपे पावसाक दोश दिवप बरोबर न्हय. रस्तो सुरक्षा समितीचे बसकेंत खात्याचे मुखेल अभियंता गैरहाजीर आशिल्ले. हे विशीं ते गंभीर नात अशें मंत्री गुदिन्होन सांगिल्लें. हाचे पयलीं लेगीत कांय मंत्र्यांनी हेर मंत्र्यांच्या खात्यांतले दोश उक्तें करून सरकाराक ‘घरचो आहेर’ दिला. हे फाटभुंयेर पत्रकारांनी सरकाराचे मंत्री हेर मंत्र्यांच्या खात्यांतले चुकीचे वेव्हार कित्याक काडटात अशें विचारलें, तेन्ना एका मंत्र्यान दुसऱ्या मंत्र्याच्या खात्याचेर उलोवप चुकीचें. रस्त्यां संबंदींच्या निवेदना विशीं मंत्री गुदिन्हो आनी हेर मंत्र्यां कडेन उलयतले अशें तानावडे हांणी स्पश्ट केलें.
मजगतीं, सरकारा आड उलोवं नाकात अशी शिटकावणी मंत्री आनी भाजपा आमदारांकूय तानावडे हांणी जायते फावट दिल्या. अजून कांय मंत्री, आमदार आपल्याच सरकाराचेर टिका करतात.
मंत्रीमंडळ फेरबदला विशीं खबर ना
पितृपक्ष सोंपतकच रोखडोच राज्य मंत्रीमंडळांत फेरबदल जातलो काय ताका आनीक वेळ लागतलो असोय प्रस्न सदानंद शेट तानावडे हांकां केलाे. ताचेर मुख्यमंत्र्यांक मंत्रीमंडळांत फेरबदल करपाचो अधिकार आसा. ताणें अजून पक्षा कडेन संपर्क सादलो ना. पितृसत्ताक सोंपले उपरांत हो फेरबदल केन्ना करची तें मुख्यमंत्री थारायतले अशें तांणी सांगलें.
भाजपाची कोअर समितीची आयज बसका
भाजपा कोअर समितीची बसका आयतारा पणजेच्या भाजपा कार्यालयांत जातली. हे बसकेंत प्रधानमंत्री नरेंद्र मोदीच्या वाडदिसा निमतान आयोजीत केल्ल्या कार्यावळीं वांगडाच हेर कांय पक्षांतल्या प्रस्नांचेर चर्चा जातली अशीय म्हायती सदानंद शेट तानावडे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
