भांगरभूंय | प्रतिनिधी
आलेक्स सिक्वेराः शिवोलेच्या लोकांच्यो आयकून घेतल्यो समस्या
भांगरभूंय । प्रतिनिधी
शिवोलीः दर्यादेग वाठारांत मुख्यमंत्री वा मंत्र्यांच्या नांवान जर कोणूय पयशे मागता जाल्यार म्हायती दियात, योग्य कारवाय करतले, अशें आस्वासन मंत्री आलेक्स सिक्वेरा हांणी दिलें. शिवोले चलो पंचायत कार्यावळींत तांणी लोकांच्यो समस्या, गाराणीं आयकलीं. ह्या वेळार आमदार डिलायला लोबो, विवीध पंचायतींचे सरपंच, पंच आनी लोक हाजीर आशिल्ले.
दर्यादेग वाठारांतल्या बांदकामांचेर चालू आशिल्ली कारवाय, येरादारी पुलिसां कडल्यान वाहन चालकांची जावपी सतावणूक, आवाज प्रदुशण आनी हेर विशयां संबंदीत समस्या रवी हरमलकार हांणी मंत्र्या मुखार मांडल्यो. न्यायालयीन प्रक्रिया चालू आशिल्ल्या विशयांचेर सरकार कांयच करपाक शकना, पूण हेर समस्यांचेर योग्य ती कारवाय करतले, अशें आस्वासन मंत्री सिक्वेरा हांणी ह्या वेळार दिलें. मार्ना पंचायत वाठारांत खेळां मैदानाची गरज आसा. ते खातीर कोमुनिदादीचे जमनीर मैदान बांदपा खातीर आदार करचो, अशी मागणी सरपंच अभय शिरोडकार हांणी केली. दांडा शिवोले घरांक जारी केल्ले नोटिसींचो उल्लेख मयूर तोरस्कार हांणी केलो. आशेलांत बांद दुरुस्ती खातीर अर्थीक मंजुरी दिवची, अशी मागणी सरपंच रेषल हरमलकार हांणी केली. तारची खाजन वाठाराचो मुद्दो पंच सिंपल धारगळकार हांणी मांडलो. घर दुरुस्ती करचे खातीर सरकारा कडल्यान मेळटा ती अर्थीक मजत खुबूच उणी आशिल्ल्याचें सरपंच हनुमान नायक हांणी नदरेक हाडून दिलें. सरपंच आनी पंच वांगड्यांचें मानधन वाडोवपाची गरज लेगीत तांणई उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
