मंत्र्यांच्या खात्यांनी बदल गरजेचो

भांगरभूंय | प्रतिनिधी

खात्यांतलीं उणेंपणा सोदून बदल केलो, सीसी टीव्ही कॅमेरे, एआय शस्त्राचो उपेग केल्यार अपघातांचो आंकडो देंवतलो अशें न्हय.

राज्य सरकारान मंत्र्यांच्या खात्यांत फाटलीं तीन वर्सां बदल करूंक ना. कांय मंत्र्यांची पिराय, तांचें शिक्षण, भलायकी, निर्णय घेवपाचेर येवपी मर्यादा आनी पडून उरिल्ल्या कामकाजाचो नियाळ सरकारान घेतला आसतलोच. वाडिल्ले अपघात हो येरादारी खात्याचो एकल्याचो विशय न्हय. भौशीक बांदकाम, येरादारी, नगरपालिका, पंचायती, नागरिकांची चलणूक, वागणूक, पुलीस खात्यांनी एकठांय येवन वावरांत बुडून घेतल्यार अपघातांचें प्रमाण उणें कित्याक जावचें ना? अपघाता विशीं नागरिकांक जाग हाडपाक यंत्रणा आयज नेमल्यो आनी फाल्यां तांचो वावर सोंपतकच यंत्रणा गेल्यो जाल्यार केल्लो वावर फळादीक जावचो ना.
अपघाताची जागृताय शिक्षणांत आठवे यत्ते सावन जावची. फक्त उजव्यान चलचें, दावे उजवे वटेन पळोवचें म्हणून जावचें ना. जितलीं रस्त्या वयलीं फोंडकुलां घात करपी तितलेच सुळसुळीत रस्ते दिसतकच गाडयो, स्कुटरी, मोटरसायकली गतीन चलोवप मरण लागीं हाडपी. अपघातांचेर विधानसभेंत सगल्यांत चड आवाज उठोवपी आदले मुख्यमंत्री प्रतापसिंह राणे यादींत आसात.
हॅल्मॅट सक्ती करप, ती नेमावळ चालीक लावप, तालांव दिवप, पयले खेपे अपघात करतल्याचें लायसन्स फाटीं घेवप, वर्साक पांच फावटी नागरिकांक जागे करप म्हत्वाचें. तेपासत येरादारी मंत्री आसतना सुदिन ढवळीकार हांणी बरे यत्नय केल्ले, खात्याची येणावळय वाडयिल्ली, पुलीस, आपवावुरपी पंगडांनी तांकां तेंकोय दिल्लो. येरादारी कडेन संबंद जोडिल्ले बसधनी, टॅंकर, बस चलोवपी ड्रायव्हर, स्कुटर, मोटरसायकल, टॅक्सी, ट्रक चलोवप्यांच्यो बसका घेवन तांकां जागोवपाची गरज आसा. ड्रायव्हराचे वर्साक एकदां भलायकी, दोळे तपासपाक जाय. पंचायत, येरादारी, उद्देग हीं तीन म्हत्वाचीं खातीं सांबाळपाक मंत्री माॅवीन गुदिन्हो हांकां जैत मेळ्ळां? पंचायतींचो कारभार पावसान वाऱ्यार घालो. साधनसुविधा उबारपा पासत हाडिल्ले डोझर, ट्रेलर्स, आनी हेर यंत्रां रस्त्या वयल्यान वतात, तातूंतल्यानय अपघात जाल्ले दिश्टी पडटले. येरादारी संचालक म्हणून आदले अधिकारी अरुण देसाय, निखील देसाय हांच्या वावराची आयजय याद काडपी आसात. खात्यांत वरिश्ठ, कनिश्ठ कामगार आसात, तांकां तंत्रीक गिन्यानय आसा पूण ते खात्यांतच बसून रावले, थारिल्ले येणावळीचीं जनेलां सांबाळत उरले जाल्यार रस्त्यांचेर सदां देंवपी कनिश्ठ कितें करतले? चिंतल्यार जाप मेळटली, येरादारी निरिक्षक, उपनिरिक्षक रस्त्यार दिसप भोव कमी जाल्यात. पुलिसांच्या येरादारी विभागाचें वजें आशिल्ले ज्येश्ठते कडेन वतात, जागृतायेंत उणे पडटात. खात्यांतलीं उणेंपणा सोदून बदल केलो, सीसी टीव्ही कॅमेरे, एआय शस्त्राचो उपेग केल्यार अपघातांचो आंकडो देंवतलो अशें न्हय. समाजाची मानसीकता बदलपा पासत आत्र्या पयऱ्यान वावरप गरजेचें. गोंया भायल्यान येवपी गाडयो, ट्रकांक शिस्त आसतली हेखातीर जतनाय घेवपाचो, शिटकावणी दिवपाचो वगत आयला. मंत्र्यांनी फक्त एकाच खात्याचेर एकचित्तान वावरांत घुस्पून घेतल्यार ताचें फळ मेळटा.
हालीं खात्यांच्या साधनसुविधांच्यो मुखेल करून कचेरेंच्या बांदकामाच्यो कागाळी वाडटात तेखातीर खात्यांचे मुखेल जापसालदार थारतात. पोरण्या बिल्डिंगेंत वावुरप म्हळ्यार जीव मुठींत घेवन काम मुखार व्हरप. पणजेंतल्यो फार्मासी म्हाविद्यालय, समाजकल्याण खातें कचेरी, उत्तर जिल्होधिकारी बिल्डींग तशेंच हेर वाठारांतल्यो कचेऱ्यो शाळा, विद्यालयां न्यायालयांच्यो सुविधा कोसमेल्यात हें पावसान दाखोवन दिलें. सर्वसादारण प्रशासन खात्या इतलेंच भौशीक बांदकाम खातें तेखातीर जबाबदार आसा? सरकारी बिल्डिंगेची देखरेख करपाची नेमावळ आसतली. कसलीय वायट घडणूक घडटकच मंत्र्यांक खेपतात, मंत्र्यां परस खात्यांचे सचीव, मुखेली, उपमुखेली तितलेच जापसालदार थारतात. मंत्री, सचीव खात्यांचेर अंकूश दवरतात? वर्साक एकदां खात्याच्या कचेऱ्यांनी मंत्र्यांक अकस्मात गेल्यार खात्यांतली परिस्थिती कळटली. आदले मुख्यमंत्री मनोहर पर्रीकार, लु्ईझिन फालेरो तें करताले. मुख्यमंत्री डाॅ. प्रमोद सावंत हांचे कडेन चडावत खातीं आसात, बसका, पक्षाचो वावर, कार्यावळींनी तांचो वेळ वता. 2027ची वेंचणूक भौमतान जिखपाची तांक तांचे मदीं आयल्या. गरजे प्रमाण कांय मंत्र्यांच्या खात्यांनी बदल केल्यार 2027त 27 मेरेन वचप शक्य आसा. शिक्षण, भौशीक बांदकाम, अर्थ, खण, खण म्हामंडळ, स्मार्ट सिटी कंपनी, एक्सायज, पुलीस हीं मुखेल कामकाजांतलीं व्हड खातीं. अनुसुचीत जमाती कल्याण तशेंच हेर ल्हान खात्यांचें कामकाज सानुलें उरुंक ना. हेर मंत्र्यांच्या खात्यांचेरय मुख्यमंत्री नदर दवरून आसतात. कांय म्हामंडळांनी कामगारय नात, अध्यक्षांचो वावर सारको जाता?
आमठाणें धरणाच्या गेटींच्या दारांचो दोश कळपाक कळाव कित्याक लागलो? रोजगार खातें सवकासायेन सुदारता जाल्यार रिव्हेन्यू (महसूल) खातें, कोयर वेवस्थापनाच्या वावराचेर समेस्त धादोशी ना. कोयर वेवस्थापना विशीं गांव ते शार पांवड्यार नागरिकांक जागोवपाक जाय, तांकां विस्वासांत घेतल्यार कोयर वेवस्थापन प्रकल्प जावपाक आडमेळीं आसचीं ना. कांय प्रकल्पांक आडमेळींच आडमेळीं हाडपीय राज्या भायल्यो यंत्रणा आसतात त्यो खंयच्यो सरकाराक वळखूंक येवपाक जाय. कोयर वेवस्थापन आनी नगर विकास खातें बराबरीन वचूंक शकतात? अभ्यास केल्यार दोनूय खात्यांचो एक मंत्री एकच आसप बरें अशी जाप मेळटली.
60 वर्सां सकल्या तशेंच पदवी मेरेन शिकिल्ल्या मंत्री सरकारी येवजण्यो बरेतरेन चालीक लावपाक जैतिवंत जाल्यात, समाजा कडेन तांणी खासा कार्यावळींतल्यान जोडून घेतलां. सरकारी वेव्हार, येणावळ, वेवस्थापनांत जैत मेळोवपी मंत्र्यांक ज्येश्ठत्वा कडेन वचपी, गेल्ल्या खात्यांच्या मुखेल्यांचे सवकासायेन फुडें सरप त्रासाचें जाता. मुख्यमंत्र्यांनी मंत्र्यांक म्हयन्याक एक दीस वेळ दिवन उपाय सोदून काडचो. मंत्र्यां कडेन भासाभास करून केल्ल्यो चुको सुदारपाक येतात, खात्यांचे बदलय भासाभाशेंतल्यान जावप बरे.
माध्यमांक खबरो जाय आसतात, एकादऱ्या प्रस्नाचेर उलयतना एक उतर मेळ्ळ्यार सरकारांतल्या मंत्री, आमदार, मुख्यमंत्र्यां मदीं पेटोवन घालपाक माध्यमां कित्याक फाटीं रावतलीं? फाटलीं तीन वर्सां सरकाराक केंद्र सरकाराच्या पालवान उदरगत करप शक्य जालां. सरकाराच्याच वांगड्यांनी एकामेकांचेर टिकाय केल्या, एकलो थांबता, दुसरो करता. खात्यांतलें उणेपण सरकारांतल्या वांगड्यांनी सरकाराक दाखोवप हाचो अर्थ सरकाराक, मुख्यमंत्र्यांक लजेक घालप अशें न्हय हें कला आनी संस्कृती मंत्री गोविंद गावडे हांणी दाखोवन दिलें. वेळार ते सादूर जाले, विरोधक बोवाळ घालतात तें पळोवन मुख्यमंत्री सत्तेंतल्या वांगड्यांक सांबाळून घेतना दिसतात. एकामेकां कडेन उलयल्यार प्रस्नय सुटावे जातात, लोकांचें मन कळटा हें तांकां होलमलां. एकठांय रावल्यार सरकाराची थिराय तिगतली. वर्साक धा मतदारसंघां मेरेन पावंक नाशिल्ले, भलायकेची कारणां दिवन भोंवपाचेर मर्यादा घालून घेवपी मंत्र्यांचीं व्हड खातीं बदलप समा जातलें.

सुहासिनी प्रभुगांवकार
9881099260