भांगरभूंय | प्रतिनिधी
गोंयांत दोतोर प्रमोद सावंत सरकाराक अंदूं पांच वर्सां पुराय जालीं. गोंयांत चड काळ सेगीत मुख्यमंत्रीपद भोगप्यां मदीं
दोतोरान आपलें नांव इतिहासांत विक्रम करून नोंद केलें. सिलॅक्टेड मुख्यमंत्री ते इलॅक्टेड मुख्यमंत्री मेरेन दोतोराची वाटचाल बरीच दिश्टी पडली. तातूंत गोंयच्या फुडाराचो विचार करून दोतोरान घेतिल्ले निर्णय मात मानपा सारकेच आसात. त्या गजालीक दोतोराची तोखणाय करचीच पडटली. पांच वर्सां पुराय जाता ते निमतान दोतोरान पंचायत चलो अभियान चालीक लायलें. कचेरेंत एसींत बसपी अधिकारी आनी मंत्र्यांक दोतोरान पंचायत पांवड्यार वचून लोकांच्यो समस्या आयकुपाक लायल्यो. बरी गजाल. ह्या निर्णंयातल्यान गांवगिऱ्या वाठारांतले खूबशे प्रस्न सुटावे जातले अशी सगल्यांकूच आस्त आशिल्ली. मात ते खरेच सुटावे जाले काय कितें हाची जाप मात लोकांनीच दिवची पडटली.
पंचायत चलो अभियाना वेळार मंत्र्यांनी लोकांच्यो समस्या आयकल्यो. कांय समस्या सोडोवपाक मंत्र्यांनी अधिकाऱ्यांक आदेशूय देले. तातूंतल्यो कितल्यो सुटाव्यो जाल्यात आनी कितल्यो नात तें पळोवचें पडटलें. कांय दिसां फाटीं सरकारान अशेंच सरकार तुमच्या दारी म्हूण एक अभियान घडोवन हाडिल्लें. हाचो लोकांक कितलो फायदो जालो खबर ना, पूण पक्षाक मात लोकां मेरेन पावपाक खूब फायदो जालो आनी ताचे परिणाम आतां वेंचणुकेंत दिसपाचे आसात. पंचायत चलो अभियानांतल्यान लोकांनी आपल्यो समस्या मंत्र्यां मुखार मांडच्यो आनी त्यो सोडोवपाक मंत्र्यांन यत्न करचे आसो तो संकल्प. थंय जाग्यार जाता तितले प्रस्न सुटावे करप वा मागीर गरज पडल्यार कचेरेंत एक वा दोन फावटी मारप.
अशेंच पंचायत चलो अभियान पेडणेंच्या चांदेल पंचायतींत जाले. त्या वेळार थळाव्यांनी आपले सगले प्रस्न मंत्र्यां मुखार मांडले आनी जाप मागली. मंत्र्यांन लोकांक जाय त्यो जापो दिल्यो नात, पूण ज्यो जापो दिल्यो तातूंतल्यान वाद जावपाचो. पेडण्यां मोपा विशय सारको गाजपी, त्या संबंदीत खात्याचे अधिकारी अभियानाक अासतले आनी आपल्या प्रस्नांच्यो जापो मेळटल्यो अशी लोकांक आस्त आशिल्ली. पूण अधिकाऱ्यांनी मात कूस मारली. लोकांनी मंत्र्यांक धारेर धरलो. नोकरी, पंचायतीचे अधिकार ह्या सारकिल्ल्या प्रस्नांच्यो जापो विचारल्यो. मात मंत्र्यांन जापो दितना दोन गजाली सारक्यो स्पश्ट केल्यो, त्यो म्हणल्यार पंचायतीक मोपाचे गेटी भितर कसलेच आधिकार ना. आनी दुसरी गजाल जीएमआर कंपनी लोकांक कायमची म्हणल्यार फिक्स नोकरी दिवपाक शकना. आतां ह्यो दोनूय गजाली जेन्ना मंत्र्यांन सांगल्यो तेन्ना एक प्रस्न उप्रासलो तो म्हणल्यार, जे मुख्यमंत्री सांगतालो पेडणेंकरांक कायमच्यो नोकऱ्यो दिल्यात ते खरें काय मंत्र्यांचे खरें? जर मुख्यमंत्र्यांचें खरें जाल्यार मंत्र्यांन फटीच्यो जापो दिल्यो आशेंच म्हणचें पडटलें. आनी फटीच्यो जापो दिवपाक मुख्यमंत्र्यांन मंत्र्यांक अशे पंचायतींनी धाडिल्ले काय किते अशेंच दिसपाचें. जेन्ना मोपाच्या ट्राफिकाचो विशय आयलो तेन्ना पुलीस अधिकाऱ्यान दोन दिसां भितर थळाव्यां वांगडा बसका घेवन विशय सोडयतां अशें सांगिल्लें खरें, पूण त्या पुलीस अधिकाऱ्याची आयज मेरेन जाग ना. लोक ताची अजून खंय वाट पळयतात.
मंत्री रवी नायकाक लोकांनी प्रस्न विचारपाक सुरवात केली. काय अधिकारीय हाजीर नाशिल्ल्यान मंत्र्यांक सगल्यो जापो दिवप शक्य जालें ना. तेन्ना कांय दिसांनी अधिकारी आनी मुख्यमंत्र्यां कडेन ह्या सगल्या विशयांचेर उलोवणीं करून परतून लोकांक आपोवन बसका घेवन विशय तडीक लायतां अशें आस्वासन दिवन मंत्र्यांन कूस मारली. मंत्र्यांच्या आस्वासना उपरांत कोणे प्रस्न विचारिल्ले तांचे फोन नंबर घेवन परतून आपोवणें येतलें अशें सांगिल्लें खरें, मात अजून मंत्र्यांची मात जाग ना. लोकांनी आतां आपूण विचारिल्ल्या प्रस्नांचेर उदक सोडचें काय कितें असो प्रस्न पडला. कारण मंत्र्यांन ज्यो जापो दिल्यो त्यो कितल्यो फटीच्यो हें लोकांनी तेन्नांच मत्र्यांचे नदरेक हाडून दिल्लें. उपरांत मुख्यमंत्र्यां मेरेन पावयतां अशे सागून मंत्री जर दोळ्यांक उदक लायता आसत जाल्यार हो ‘शॉ ऑफ’ न्ही जाल्यार आनी कितें? अशें आसल्यार परतून आनीक कसलें अभियान नाका रे बाबा अशे म्हणचें पडटलें. एक मात मंत्री रवीक एका गजालीक मानचो पडटलो. तें म्हणल्यार लोकांचेर फर्र करिनासतना तांणी लोकांचें आयकून तरी घेतलें. काय अधिकारी फर्रफर्रपाचो यत्न करताले, पूण लोकांनी तांचे खपोवन घेतलें ना.
ह्या सगल्या प्रकारांतल्यान एक गजाल मात सारकी नमूद कारपा सारकी आनी ती म्हणल्यार, जीएमआर कंपनी फिक्स नोकरी दिवपाक शकना आनी पंचायतीक विमानतळाचे गेटी भितर कसलेच आधिकार नात. मंत्र्यांन सरळ सांगलें मात मंत्र्यां वांगडा माचयेर बशिल्ल्या एकल्याय सरपंच वा पंचान मंत्र्यांक मात हाचेर कांयच विचारलें ना. जेन्ना सुप्रीम कोर्टान आपल्या निवाड्यांत स्पश्ट म्हणलां की थळावे संस्थेक विस्वासांत घेवचे तेन्ना मंत्री अशें कशें सांगपांक शकता? पूण जालां अशें सरपंच, पंच आसात तांकांच खबर ना आपल्याक आनी पंचायतीक कसले अधिकार आसात ते. आनी खबरूच नाशिल्ल्यान आपल्या अधिकाराक झगडटलो कसो आनी कोणा कडेन अशें जालां तांचे. मात आतां हाचेर उपाय एकूच आसा तो म्हणल्यार लोकांनी जागे जावचे पडटलें. सरपंचाक जागो करचो पडटलो. आनी सगल्यां पंचायतींनी आपलो अधिकार राखून दवरपाक झगडचें पडटलें. जाल्यारूच थळाव्यांक कितेंय लाव जातलो ना जाल्यार कांयच जावपाचें ना इतलें मात खरे. आतां पंचायत चलो जालें. आतां वेंचणूक येतली तेन्ना तरी सरपंचाक आपले अधिकार आनी मंत्र्यांन दिल्ल्यो जापो याद उरल्यार पुरो.
ज्ञानेश्वर वरक
9403541232
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
