भांगरभूंय | प्रतिनिधी
मंत्रीमंडळांत बदल करपा खातीर हालचाली सुरू
भांगरभूंय । प्रतिनिधी
पणजीः गोंय मंत्रीमंडळांत फुडल्या कांय दिसांनी बदल जावपाचो आसा. ते नदरेन भाजपाच्या वरिश्ठ फुडाऱ्यां वरवीं मंत्र्यांचे कामगिरीचो नियाळ घेवपाक सुरवात जातली, अशी म्हायती भाजपाच्या सुत्रांनी सोमारा ‘भांगरभूंय’क दिली.
गोंय विधानसभेचें पावसाळीं अधिवेशन सोंपले उपरांत मंत्रीमंडळांत बदल जातले, अशे संकेत अधिवेशना आदीं स्वता मुख्यमंत्री डॉ. प्रमोद सावंत हांणी दिल्ले. ते प्रमाण आतां मुख्यमंत्री आनी प्रदेश भाजपाच्या वरिश्ठ फुडाऱ्यांनी ते संबंदांतल्यो हाचलाची गुप्तपणान सुरू केल्यात. संसदेचे अधिवेशन सोंपिल्ल्यान राज्यसभा खासदार तशेंच भाजपा प्रदेशाध्यक्ष सदानंद शेट तानावडे मंगळारा गोंयांत पावतले. ते उपरांत प्रक्रियेक गती मेळटली, अशें सुत्रांनी म्हणलां.
गोंय मंत्रीमंडळांतल्या कांय मंत्र्यां कडल्यान दर्जेदार कामगिरी जाता. आपापल्या खात्यांच्या येवजण्यांचो लाव ह्या मंत्र्यां कडल्यान तळागाळांतल्या लोकां मेरेन पावोवपाचो प्रामाणीक यत्न जाता. पूण कांय मंत्र्यांची कामगिरी मात पुराय तरेन देंवल्या. तांचे विशीं लोकूय कागाळी करपाक लागल्यात. अश्या सुमार तीन मंत्र्यांक मंत्रीमंडळांतल्यान काडून तांचे सुवातेर नव्या आमदारांक संदी दिवपाचो विचार पक्षान केला.
लोकसभा वेंचणुके आदीं मंत्रीमंडळांत बदल जातलो अशी चर्चा वरिश्ठ फुडाऱ्यां मदीं चलताली. पूम ताचो परिणाम वेंचणुकेंत भाजपाचे कामगिरीचेर जावपाचो अदमास घेवन पक्षान फेरबदलाचो निर्णय फुडें धुकलिल्लो. मंत्रीमंडळांतल्या खंयच्या मंत्र्यांक काडपाचे आनी कोणाक भितर घेवपाचे, हाचे पुराय अधिकार मुख्यमंत्री डॉ. सावंत हांकां दिल्यात. ते प्रमाण मुख्यमंत्र्यान लेगीत हे विशीं विचार सुरू केला, अशें सुत्रांनी स्पश्ट केलें.
अधिवेशनांत योग्य जापो दिवंक नाशिल्ले मंत्री रडाराचेर!
हालींच सोंपिल्ल्या पावसाळी अधिवेशनांतल्या तीन ते चार मंत्र्यांचे कामगिरीचेर भाजप फुडारी बेजार आसात. कांय मंत्र्यांक विरोधकां सयत सत्ताधारी आमदारांच्या प्रस्नांक लेगीत योग्य पद्दतीन जापो दिवपाक जाल्यो नात. ताका लागून लोकां मदीं त्या मंत्र्यां विशीं चर्चा चल्ल्या. ते खातीर त्या मंत्र्यांक बेगिनात बेगीन काडपाची मागणी वरिश्ठांन मुख्यमंत्र्यां कडेन केल्या. ताका लागून फुडल्या कांय दिसांनी फेरबदल जावपाक शकता, अशें सुत्रांनी म्हणलां.
आयकनात त्या मंत्र्यांक काडपाची मागणी
मंत्रीमंडळांतले कांय मंत्री मुख्यमंत्री तशेंच पक्षाक विस्वासांत घेनासतना मनमानी कारभार करतात. ते विशीं समज दिवन लेगीत ते पक्षाचें आयकुपाक तयार नात. अश्या मंत्र्यांक तत्काळ काडचे, अशी मागणी भाजप पदाधिकारी आनी हेर फुडाऱ्यां कडल्यान नेटान जावपाक लागल्या. ताका लागून मंत्रीमंडळ फेरबदलाचो निर्णय बेगिनात बेगीन घेवपाचेंय पक्षान थारायलां, अशेंय सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
